去年熱爆劇《巾幗梟雄》班底包括「視帝」黎耀祥、「視后」鄧萃雯、謝雪心與惠英紅等,昨日為續集《巾幗梟雄之義海豪情》(暫名)試造型。貴為「視后」的雯女坦言,今次演毒梟角色甚具挑戰:「演咗咁耐戲,都估唔到有啲角色唔識演,睇咗十集劇本都仲係揣摩緊。」雯女「埋怨」監製李添勝與編審張華標創造出既溫柔又會保護女人的「柴九」贏盡Fans歡心,但現實生活中卻難求,難怪雯女指現實中也在等待「柴九」的出現。
扮演警察的祥仔被問到可有信心冧莊「視帝」﹖他說:「到時先算啦!角色好難演,依家講講吓都有啲壓力。」他雖然有「壓力」,但有信心收視更勝上集:「呢套係張華標喺無綫最後一部劇,係佢嘅紀念作,我實百分之二百支持佢,實行置之死地而後生。」對於與雯女再合作,祥仔不擔心再傳緋聞,認為公道自在人心。