祖兒前晚在亞洲博覽館舉行《新城容祖兒我的女皇音樂會》，吸引英皇老闆楊受成、經理人霍汶希及祖兒母親捧場。雖然祖兒因感冒致聲沙變磁性，但唱功未受影響，更連唱11首歌展示實力，惟唱《我的驕傲》時甩嘴兼唱錯歌詞，不過她仍笑說：「總之今晚唱到爛聲我都會唱落去！」

身穿透視裝的祖兒，玉背若隱若現。	設計師Sean.K上台為祖兒變Look，夠晒新意！	去年人氣急升的鍾舒漫，撐場不忘晒料。

祖兒更解構身上的「女王舞衣」可變出多個造型：「條裙好重，我會一路唱一路除，我會喺個台度換衫，換足十幾次畀大家睇！」每唱完一首歌，外籍設計師Sean.K便上台為她的舞衣變身，由長袖變冇袖，再由長裙變短裙，原先的宮廷式晚裝逐一除下，最後除剩一件貼身Body，性感如神奇女俠：「我咁着好冒險o架，都叫做除咗條裙喎！不過你哋咁零碎掌聲，我好心痛o架！」歌迷隨即鼓掌！祖兒其後唱《桃色冒險》時，更讓舞蹈員摸腿攬腰瞓身演出，氣氛高漲！

Sherman鋼琴伴奏

另外，祖兒的同門師弟妹洪卓立（Ken）、陳偉霆、鍾舒漫（Sherman）及洪杰擔任嘉賓，去年大病一場的Ken因再踏舞台而感觸落淚：「嗰時好唔開心，好多想做嘅事都做唔到，好想放棄！多謝公司再畀機會我，我會做個『勁爆開心人』！」至於Sherman則以鋼琴伴奏，與祖兒合唱《給自己的信》。