近年演藝界出現生仔潮，但大部分明星媽咪都係生千金，搞到曹永廉個「慈姑椗」特別馨香。早排小小So約咗阿廉同佢囝囝Brandon飲茶，阿廉話個仔勁受歡迎，依家開始幫佢揀老婆。
小小So：乜咁快幫佢搵老婆？
曹永廉：係呀！嘉嘉（姚嘉妮）個女未出世已經同我個仔指腹為婚，嘉嘉仲叫我個仔做女婿，但後來發現佢見親BB仔都叫女婿，實在太濫！我叫個仔睇定啲先，哈哈。
小小So：乜好多選擇咩？
曹永廉：林文龍、胡諾言同好多圈外朋友都係生女，我個仔當然特別馨香！有時大家約埋出嚟聚會，成班小朋友玩得好開心，我個仔又和藹可親，梗係大受歡迎啦！
小小So：咁囝囝最鍾意邊個？
曹永廉：佢咁細個，邊識分男同女呀！總之係細路仔就啱玩，反而大人就鍾意同大哥哥玩多啲，我都要多加留意佢嘅取向。
小小So：你又鍾意邊個BB女？
曹永廉：講真，個個明星二代都咁靚，但文龍個BB女嘅五官真係好標致！