陳奕迅為全新EP拍攝封套,以長髮造型挑戰張國榮的妖冶味道,拍攝時被強風吹到頭髮亂舞,他笑言終於明白女人之苦!
陳奕迅(Eason)全新廣東EP《Time flies》將於本周五推出,日前他拍攝EP封面,繼上次「鬍鬚佬」造型掀起話題後,今次繼續應造型師要求,駁上一頭長長秀髮,加上雙眼超黑Smoky Eyes眼影效果,認真型爆!Eason說:「今次仲辛苦過上次黐假鬚,啲頭髮要一執一執咁駁上去,再要拉直同埋修齊,加加埋埋搞咗成八個鐘頭。」
吹頭手舞足蹈
為增強立體感覺,拍攝期間利用吹風機向Eason的秀髮狂吹,加上他手舞足蹈,令造型師大讚他有張國榮(哥哥)唱《大熱》的影子,Eason說:「我又唔覺得好似,始終喺我心目中,哥哥係數一數二嘅魅力王子,嗰種型同埋氣質真係冇人可以取代!」完成拍攝後,Eason大呼疲倦,因一頭長髮令他感到又熱又焗,非常吃力:「原來女人長頭髮係咁辛苦,又熱又Fing嚟Fing去好唔方便,雖然仲要加埋個時鐘裝飾喺上面,真係勁辛苦,不過出嚟個效果都幾好,我好滿意。」
百變潮Look玩花臣
陳奕迅(Eason)以長髮飛纏拍唱片造型,散發妖冶味道。愛玩花臣的他過往有不少潮爆造型,令人印象難忘!
鬍鬚Look
去年Eason在專輯《H3M》封面貼滿鬍鬚,但他被嘲似《鹿鼎記》中的大奸角鰲拜!
潮爆度:★★★★
吹氣公仔帽
Eason Eason 03年出席頒獎禮時,頭戴吹氣公仔帽,非常配合頒獎禮的玩樂主題,十分搞笑!
潮爆度:★★★
男版GaGa
年初以魔鬼造型亮相頒獎禮,其中一對Smoky Eyes似足男版Lady GaGa!
潮爆度:★★★★★
透視婚紗
Eason 07年輕易駕馭透視裝及戴白色頭紗,為演唱會揭開序幕,完全不突兀。
潮爆度:★★★★
怪誕睡衣
Eason曾以睡衣Look亮相《新城頒獎禮》,慶功宴時還戴上銀色聖誕帽,誇張搞笑兼備,認真怪「誕」!
潮爆度:★★★