容祖兒係圈中數一數二嘅勤力又專業嘅藝人，小小So知道祖兒早排出咗新碟，裏面換咗8個唔同款式嘅造型，要女仔扮靚當然冇問題，但其中一個要搞到由頭到腳髹到「黑麻麻」就唔係個個女仔都頂得住！
祖兒：同造型師都鍾意試新嘢，自己係好鍾意Miffy公仔，咪諗咗一個變種黑色「Joffy」出嚟，諗咗就要做啦！
小小So：成塊面髹到黑色？
祖兒：係呀！因為要影近鏡，助手就連我嘅耳窿到鼻哥窿，總之見到光嘅，都幫我髹到黑色唔可以幸免！
祖兒同小小So講拍呢個造型全程「罰企」，因為怕周圍坐，黑色油整污糟其他地方，最慘反而係落妝，黑色油好難洗，尤其指甲隙縫邊好難搞，最後阿媽要出動「百潔布」狂捽，先洗得清啲黑油！