第一個十年：80s叛逆姑娘
自去年底，林莉決心轉型做模特兒，「言行」亦愈來愈大膽，時常穿着性感服飾行騷，甚至傳她的男友是模特兒公司老闆。林莉聽到「男朋友」三個字，即時作出否認，對於自己的行為「突變」，她追溯到童年：「其實我唔係突變，我覺得人係有好多面，表面上我係個悶蛋，但我都有另一面，唔甘心做個乖女。」屋邨長大的林莉，出身自家教甚嚴的傳統家庭，令她變得溫文爾雅，她說：「細細個阿媽驚我養唔大，佢話我乖到有啲驚，有一次發高燒，換轉其他小朋友都會扭計大喊，但我就好似唔識喊，怕我燒壞腦。」
在父母心中，林莉表面上是一個Perfect Kid，其實她內心早存反叛：「我知道爹哋媽咪對我好，我唔可以行差踏錯，況且小朋友可以壞得去邊，惟有乖乖哋做灰姑娘！細細個我冇好似其他小朋友顧住出街玩，因為我知道媽咪一定唔放心！」
第二個十年：90s愛扮玉女
在90年代，流行四大天王、台灣小旋風林志穎襲港，林莉坦言至愛周慧敏（Vivian）：「當年我同班女同學都會偷偷帶周慧敏嘅閃卡返學，又會互相交換，同埋聽佢嘅CD。到今時今日，我依然當佢係偶像。」談到周慧敏，平日寡言的林莉即時變了開籠雀：「我會學Vivian咁梳個劉海頭，又攞媽咪啲化妝品化佢個妝，好彩佢冇染髮，如果唔係我一定跟！」未知是否受Vivian的玉女形象影響，林莉不知不覺也滲入了玉女DNA，時至今日也以這個形象示人：「唔可以講話我學佢，不過我自自然然會打扮成呢個形象！」
講到學生時代，林莉坦言十分懷念，至今依然與一班同學保持聯絡，她說：「依家成班人都會出嚟定時聚會，但我一定唔會係發言嗰個，最多只係坐埋一邊聽人講嘢。」
第三個十年：千禧橋壇新丁
走到今天，林莉以一個全新形象「翻身」，冠上「翻版林志玲」之名踏上天橋，目標清晰明確，她說：「今年對我嚟講好重要，唔可以錯過每個機會，我會搏到盡，唔怕辛苦！」林莉表示公司已安排連串工作：「我最想拍一啲有代表性嘅廣告，我成日見到Sogo對出大大幅海報，我真係好恨拍！」雖然目前的工作以行騷為主，但她首個工作已是行國際名牌Chanel的時裝騷，這算是個好開始，問到她當時是否有壓力，她說：「壓力一定有，上次Casting一共有40幾個女仔，又有外國人，好彩嗰次品牌方面想要中國女仔，所以我成功咗。當時真係好開心，開心到瞓唔着，因為覺得自己轉型呢個決定冇錯。」
講到傳聞中的富貴老闆男友，她嗲聲嗲氣地說：「我覺得好奇怪，點解會扯上個咁樣嘅關係，因為我係公司嘅人，佢會投放資源喺我身上，可以叫做投資，佢會出一啲錢，希望我做得好，幫我第時賺錢亦幫公司賺錢，呢個完全係一個工作角度，但我唔知點解會扯上其他關係。」單身的她坦言有追求者，但現階段不想拍拖，反而想盡快成為「小富婆」：「最想係買樓，我會視為一個工作目標，搵一個安樂窩。」
後記
「橋壇」新丁林莉近期愈戰愈勇，見報率高過參選港姐的時候，她終於明白要「上位」就要付出的道理，前輩陳嘉容有次看到她亦作出鼓勵，為港模爭光。對於能否真的成為下一個「林志玲」，她說：「我唔想似林志玲，我想大家記得我叫做林莉。」