張國榮、梅艷芳、聖鬥士、York、Boy London……這些人與物都是80年代出生一群的集體回憶，張繼聰（Louis）是他也是你和我，80年出生的他跟你與我一樣同在這樣的屋簷下成長……在80年代草根下茁壯成長，走過90年代的追女歲月，到千禧年為人老竇，當下的Louis從幽暗練成百煉鋼……已30歲人的他要乘時光機，驀然回首這3個十年，不難發現所有80後都是這般成長。

第一個十年：80s屋邨波牛

「褲袋窮，心富足」絕對是Louis兒時的寫照，愛民邨長大的他面對周遭都是童黨、煙仔及毒品等問題，因家嚴Louis選擇正途，日日踢波：「家父好嚴，自己從來都唔敢行差踏錯，我9點就要上床，好有生活規律，嗰時最鍾意4點半趕返屋企睇《足球小將》，雖然戴志偉踢衝力射球都要擺兩三分鐘姿勢，不過都好想好似佢咁好波，咪日日落街踢波，一直踢到青年軍，我係一個典型屋邨波牛！」

80年代電腦還未盛行，縱使Louis每晚準時9時上床睡覺，但為了偷聽軟硬，他惟有匿入被竇扮瞓覺：「嗰時收音機聽《老人院》（軟硬節目）好盛行，我咁In當然係其中一分子！不過老竇話成11點太夜唔畀聽，惟有匿喺被竇偷聽囉！我係軟硬Die-hard粉絲，細細個已經好鍾意林海峰，入行之後識到佢真係覺得好醜，點解佢心境同個樣都可以後生過我！仲有我亦會偷偷起身睇《聖鬥士星矢》，不過我唔鍾意星矢嘅天馬流星拳，紫龍盧山昇龍霸型好多。」雖然細細個已懂得偷雞聽收音機，但Louis自幼已知道書中自有黃金屋的道理，從來也犯不着父母監督讀書：「從來老竇媽咪都唔使逼我讀書，因為我知讀得唔好就會好內疚，中三前每次考試一定頭十名，試過一次考得特別好，老竇就送咗一部世嘉五代（遊戲機）畀我，我覺得好威！因為當時啲細路都係打紅白機同小天才！」

第二個十年：90s轉型冧女

童星出身的Louis，細細個便擁有一張奶油粉面，十分可愛！踏入青春期，男仔開始發育，臉上暗瘡開始爆發，最慘是青春期腦內蕩漾，他感到危機漸漸逼近：「青春期嘛！唔知點解都係得五呎高，中三時仲係企最前，我知道再踢波落去一定成世做矮仔，矮一定追唔到女仔，加上變樣，真係好困惑！」適逢當時動畫《男兒當入樽》興起，Louis知道係時候變成「流川楓」冧女：「睇《入樽》真係令我茅塞頓開，轉打籃球除咗想高，就係想追女，吸引女同學注意，但係我一沉迷打籃球就無法自拔，真係學櫻木花道咁做2萬球訓練，由唔識打波，到一個暑假就入校隊，沉迷到我冇再留意女仔。我又好勝，打到連老婆仔女都唔理，最後由校隊打到區隊，勁到差啲可以入樽！」

踏入青春期，人開始蛻變，欲望漸生，開始留意名牌，Louis也一樣開始留意屬於90年代的學生名牌：「嗰時我會留意Boy London、Mandarina Duck（簡稱M Duck）、Levi's同Testwood，York啲牛仔褲太誇，我唔鍾意！」可是，始終褲袋的零錢不是滿滿的，Louis自知不可能追得太多，所以抑壓了欲望：「17、18歲我都經歷過買名牌嘅年紀，自己又唔係有錢，追乜都冇用！好彩我冇變成名牌奴隸！」

對於90年代，Louis有這樣的總結：「中一、二我有喺電台拍劇，有得上電視，個樣又幾Cute，所以都算係一個風頭躉；但中三開始樣衰，所以醉心打波發展內涵，成個中學時代，只得一個女朋友，我同老婆謝安琪都係讀恩主教中學，不過我唔知佢係乜水，但佢話知我係邊個！」

第三個十年：千禧患得患失

走過90年代無憂無慮的體育世畀，Louis面對97回歸後香港經濟泡沫爆破，醉心藝術的他毅然報讀演藝學院，挑戰可能沒有明天的事業，他說：「當時嘅目標係做演員，所以讀演藝。往後時間令我知道乜嘢叫自由，走堂、識女仔、上堂、讀自己鍾意嘅嘢……好Free，的確係我人生嘅轉捩點！」可惜每逢一個人生關口，Louis總遇上絕對的變數，02年畢業的他十分不好彩，翌年遇上沙士兼金融風暴，大抵是上天要琢磨Louis的志氣：「我由一個年輕人，經歷入社會工作嘅徬徨，跟住結婚生仔，但我知道只要保持童真，只要擁有一點赤子之心，我知道自己唔會衰得去邊！」

的確，有段時間Louis的事業與老婆謝安琪（Kay）差天共地，有些人卻立壞心腸咒罵其婚姻，不過Louis對這些挫折卻一笑置之：「我會平常心處理呢啲問題，乜嘢叫失敗，我之前真係好似發生咗好多事，但我OK！嗰啲報道唔會令我將唔開心嘅嘢帶番屋企，更加唔會影響到我同Kay嘅感情，如果影響到就係我懦弱，但我覺得講我同Kay咪算，禍不及家人，呢樣係我最嬲嘅！」

幸好上天為Louis帶來一件珍貴的禮物，就是囝囝張瞻，只要眼見愛子純真的臉，甚麼怨氣也能拋到九霄雲外：「同個仔一齊嘅時間最開心，做父母嘅有時可以同個仔無無聊聊行大埔，同佢一齊放風箏，我已經心滿意足！個仔兩歲半喇，佢依家會叫我『大哥』，好好笑，我漸漸明白原來做老竇係咁開心，我一定會睇住佢第一個十年嘅成長，直到自己百年歸老！」

後記

呷一啖凍檸茶，吃一口西多士，Louis就是這樣跟小記做訪問！畢竟在屋邨長大，他何時何地也能屈能伸：「80後都可以分好多種，有啲咬住金鎖匙出世，唔知個苦字點寫；有啲草根下長大，可以適應唔同環境！不過佢哋大多都係幸福嘅一群，起碼唔使捱餓！」此時助手正為Louis「篤檸檬」，小記笑他太依賴，Louis笑說：「唔抵得我咁幸福呀！」