07/03/2010

播放本新聞相關短片

周秀娜單挑星野凸圍失敗

人氣女模Angelababy、周秀娜與諸葛梓岐昨日在日本行騷,以出場五次的Baby獨領風騷。32D周秀娜原定晒比堅尼撼「童顏巨乳」星野亞希,卻臨門錯失機會!

港模Angelababy、周秀娜(Chrissie)與諸葛梓岐昨日在日本橫濱為Tokyo Girls Collection(TGC)春夏季時裝騷行騷,與人氣日模包括長谷川潤、藤井莉娜、星野亞希、吉川日奈與山田優等比併,吸引25,000名Fans捧場,更有Fans在早上九時冒雨排隊等入場!

後台開中門補飛

去年成功「升呢」進軍東瀛的Baby,深受當地品牌歡迎,昨日為日牌Mercy、Khajn與Sons De Mode等示範新裝,在天橋由朝行到晚,先後換上四套靚衫及一套和服。Baby的造型貫徹其可愛風格,在台上表現淡定,其中與日模孖住行騷。Baby坦言對表現滿意,最開心是聽到台下有Fans叫其名字:「上年聽到有Fans叫我『Baby』,但今次佢哋叫全名,我都有同番佢哋打招呼。」她直言今次最難忘是穿上和服:「和服有啲緊,唔可以大步行,呼吸有困難,但可以着係好難得嘅機會。」

至於去年行騷送飛吻突圍的Chrissie,今次顯得有點失色。穿上Fila外套的她,原本打算拉開外套騷比堅尼Top,竟臨場被工作人員安排手持球拍及派禮物,令兩手無暇拉開外套,相比同場行騷的F Cup「童顏巨乳」星野亞希勁騷比堅尼,搶盡「峰」頭。Chrissie狂呻到最後一刻才知要手持球拍出場,她說:「綵排時冇呢啲嘢畀我,到出場時啲人就畀呢啲嘢我,又派禮物同除帽,做咁多嘢已經做唔到(除外套)!(星野亞希怕你搶鏡?)唔知!我喺台上好多嘢控制唔到,但如果大家想睇我除衫,可以上網搵我拍啲廣告。」她隨即在後台主動拉開外套「補飛」,但在行騷時兩度出錯,先是除帽時頭髮飛散,狀甚狼狽,其後又行錯路,連她亦坦言對表現要扣少少分。

飛來蜢邀開派對

期間,Chrissie惹來艷遇,一名日本男士在後台與她密密斟,她解釋:「我唔知佢係邊個,只知佢係日本人,話想帶我去玩,但我拒絕咗!(溝通到?)都可以,用身體語言。(佢想帶你去邊?)佢想帶我去Party。」場內靚女行騷,場外亦十分熱鬧,大會安排不少美容品牌攤位,當中DHC攤位主攻收身產品,甚受歡迎。

專案組