07/03/2010

播放本新聞相關短片

四太連趕4場照顧賭王

萬眾期待下,賭王何鴻燊昨日終於出院,四房同心合力出招冧賭王!由於陪賭王出院的重任落在二房身上,其餘各房惟有以奇招突圍,長房在大宅密密幹,三房扮靚靚,四太則連走4場,認真頻撲!

賭王何鴻燊先後在港安醫院及養和醫院留院合共224日,昨日終於出院,四房人出招氹賭王歡心,各出奇謀迎接他返回淺水灣道一號大宅,其中以剛由北京返港的四太梁安琪最頻撲,前晚她先後在醫院陪過夜、返大宅打點及到馬場為賭王拉頭馬,最後再折返大宅,走足4場!

換花裙報雙喜臨門

梁安琪前晚負責留在醫院陪賭王過夜,直至昨午1時15分戴着黑超、身穿粉紅色運動服才離開醫院。當她見到大批傳媒等候時,依然面帶笑容回答記者提問,她表示賭王還未換好衣服:「(賭王)喺上面,一陣間先,好快佢就會換衫出院,多謝大家關心,辛苦晒!」由於現場有太多傳媒包圍,令她舉步維艱,不過心情大好的她仍笑說:「可唔可以畀條路我行?」離開醫院後,四太先返家換衫,再往大宅幫忙打點,接着出發到沙田馬場出席港澳盃,因昨日適逢賽馬日,賭王有馬「爆料」出賽,最後愛駒勝出,雙喜臨門,四太代表賭王拉頭馬,為賭王攞彩。約下午5時45分,身穿花裙的她即再返回大宅向賭王報喜,約半小時後離開,行程緊密!

二房代言三房扮靚

至於二太藍瓊纓未有在醫院露面,但她派出3名女兒包括超鳳及超蕸全程貼身照顧及陪伴賭王出院,以及代表發言。約6時半,戴着口罩的二太由大宅離開,問到賭王情況?她笑說:「好好!」而三房亦不輸蝕,未能陪伴賭王出院的三太陳婉珍,深知賭王喜歡靚女,惟有盡力將自己打扮得靚靚!她更一早約定化妝師到寓所為自己、女兒超雲及超蓮化妝,實行以最靚一面迎接賭王!而四房當中以長房最低調,女兒超雄及超賢早在大宅為賭王回家作打點,直至6時許,才見超雄笑着離開大宅!

第一手消息請瀏覽on.cc《即時新聞》

名人組