李彩華（Rain）近年往返內地拍劇及登台搵真銀，成功吸金，但她表示在內地登台時，曾發生疑似「抽水」事件，令她猶有餘悸：「兩年前去登台，嗰時同觀眾有近距離接觸，因為太多人，啲人前推後擁，保安為咗保護我，又好大力推開啲人，混亂間我畀人摸腳，感覺好似被非禮，或者啲人係冇心，但我都感覺唔舒服。」Rain表示當時身穿裙子演出，故經此一役，她往後登台也改穿長褲：「依家識得應變，除咗打扮稍為密實外，仲會同保安溝通清楚，現場環境有乜唔對路，會以最安全嘅方法離開現場。」

李彩華坦言日後登台，已學會執生。	Rain拍劇經常吊威吔，令盆骨受傷，認真冇陰功！	李彩華雖然賺多了人仔，但背後卻要付出血與汗！

盆骨受創

除了登台遭遇不快事外，Rain還試過拍劇時盆骨受創，她說：「有次同張衞健喺內地拍劇，我飾演馬戲班空中飛人，所以成日都有吊威吔場面，試過連續吊咗十幾個鐘，除咗中間補妝同去洗手間外，大部分時間都吊喺空中，期間仲撞傷盆骨，拍完之後，盆骨冇晒知覺，要即刻返香港睇醫生，好彩最後冇事。（驚唔驚再吊威吔？）盡量可免則免，因為有啲陰影。」此外，Rain又謂拍攝內地劇集《大丫鬟》時亦險毀容，幸最後有驚無險，她說：「依家拍劇盡量小心啲，有太多突如其來嘅嘢發生。（係咪好捱得？）都算襟捱。」