向來鍾意揸直升機嘅王敏德（Michael），閒時除咗揸吓直升機，都好鍾意唱吓歌仔，唔好睇佢成個半唐番咁，查實佢唱國語歌非常一流！小小So早排喺中環撞到Michael同佢嘅好友，佢一見到小小So就問會唔會喺佢生日（4月16日）捧佢場？原來嗰日佢會去澳門一個賭場表演，個場可以容納660位觀眾，依家啲飛賣得七七八八，所以佢好興奮咁話：「我哋會以拉斯維加斯嘅登台形式表演，依家先做一場，如果反應好就會加開，呢個月中就會知道賣飛情況，不過聽講反應好熱烈，真係好開心！」
Michael又話過年同老婆仔女去拜年，問佢每年會封幾錢利是？佢一臉尷尬咁話：「我都唔知呀！每年都係老婆負責封利是，佢畀幾多我就有幾多，所以要問老婆先知！」估唔到外表瀟灑嘅Michael原來咁聽老婆話，不過俗語有云：「怕老婆會發達」，小小So終於明白點解Michael有咁多閒錢去揸直升機做上等人喇！