粵劇名伶阮兆輝個仔阮德鏘成日都會陪爸爸出席活動，認真乖仔！不過小小So有日撞到呢個後生仔，覺得佢發咗福之餘，個樣仲有少少唔同咗，原來佢為套劇整容，真係有苦自己知！
小小So：咁耐唔見，你個樣好似唔同咗！
阮德鏘：係呀！肥咗，同埋整咗雙眼皮！
小小So：整容？乜你咁誠實自爆？
阮德鏘：依家內地拍劇係咁，佢想你雙眼皮，就會畀埋錢你去做手術，我每隻眼釘咗三針，就變咗雙眼皮，冇辦法啦！套劇需要嘛！
小小So：雙眼皮咪幾好，個人精神啲！
阮德鏘：原本諗住唔拆o架喇！不過自己成日捽眼，搞到有少少腫，可能遲少少去拆咗佢！
小小So：吓？拆？咁如果下套劇又要你整雙眼皮咁點算？
阮德鏘：到時佢會再畀錢我去做手術o架啦！到時先再算！
小小So：嘩！乜原來依家拍劇咁辛苦，你真係為藝術作出好大犧牲！