由任達華與吳君如主演、揚威柏林影展的新片《歲月神偷》，前晚舉行慈善首映。除了主角任達華、吳君如、李治廷及蔡穎恩（Evelyn）出席外，黃百鳴及李曼筠（動漫Maggie）等亦有捧場，其中身穿低胸裙的Maggie極度性感，艷壓全場！

李治廷與蔡穎恩盛裝出席首映禮，襯絕出場。

李曼筠身穿性感低胸裙出席，搶去各主角不少「峰」頭。

向來搞鬼的君如，與華哥一起接受訪問時搞爛Gag，當華哥被問及會否如哥哥任達榮般考慮退休時，她即插嘴：「叫你阿哥試吓演戲呀！不如叫佢做賊囉！佢都做咗成世警察啦！」雖然華哥未有理會君如，卻透露暫不會考慮退休：「因為我太鍾意拍戲。」

與陳可辛鬥唔怕傷感情

談到是否有信心在金像獎奪獎時，君如表示票房最重要：「唔諗o架喇！希望套戲有咗個票房先，攞獎都係其次！」不過，事後她自爆由於是金像獎五十名評審之一，雖已投了《歲》片及華哥一票，但不能投票給自己，所以希望華哥幫忙呼籲身邊朋友投票，十分搞笑！至於華哥則淡然表示「成事在天」。　

另外，君如另一半陳可辛的《十月圍城》在金像獎中有十多項提名，問到會否擔心與陳可辛爭獎傷感情時，她即笑說：「佢都冇女主角提名！唔怕！」而《歲》片監製張婉婷則透露近期太忙，連從柏林返港的行李也沒有時間整理。談到票房目標，她則笑說：「希望票房好，等我畀番正價華哥（任達華）同君如！」