本文重點
鑽石組合Twins分別兩年,昨晚終在《英皇盛世10周年巨星演唱會》中合體唱冧歌,為四月的演唱會熱身!
英皇娛樂昨日在澳門威尼斯人度假村酒店舉行春茗及《英皇盛世10周年巨星演唱會》,旗下歌手容祖兒、謝霆鋒、古巨基、蔡卓妍(阿Sa)、鍾欣桐(阿嬌)、林俊傑及范植偉等大晒冷!基仔與祖兒率領男、女歌手以紅、白組形式現身演唱會,祖兒落樓梯時不慎絆倒,緊隨其後的Twins拖手出場,而壓軸現身的謝霆鋒則揮舞黃金大旗。
緊張到標汗
將於四月舉行演唱會的Twins昨日首度正式合體,並壓軸獻唱經典慢歌,阿Sa坦言緊張到雙手標汗:「啲歌好耐冇唱,除咗上次做祖兒個騷,已經兩年冇出過嚟。」她讚阿嬌狀態大勇:「第一次見到阿嬌跳佢首《心多》,表現好好!(驚唔驚喊?)唔知o架!如果想喊就搞爛Gag,氹大家笑番!」
至於阿嬌則自言心情OK,談及與陳偉霆的緋聞,她說:「佢係師弟。(同Race男友傳緋聞?)呢啲唔再回應,呢兩年經歷好多,依家希望專心工作。」對於與方力申合演的電影《出水芙蓉》獲內地解封,她說:「係好開始,希望好落去!」至於有關茅山師父的傳聞則不作回應。而陳偉霆則表示會與阿嬌跳辣身舞,但不夠膽摸她。