今次《歲月神偷》揚威柏林，令台前幕後振奮不已。男主角任達華接獲好消息時剛巧準備由上海飛返香港，他開心地說：「有成14部電影角逐，攞到獎一啲都唔簡單！電影講60年代香港人嘅拚搏精神、夫妻情同父子情，能夠喺全球表揚呢種價值觀，我以身為中國人感到驕傲！」
而吳君如早前隨陳可辛返泰國過年，未有親赴柏林，她對此感遺憾：「聽日（即今日）我要去橫店拍戲，咁啱羅啟銳同張婉婷又返嚟，雖然前後腳但大家點都要聚一聚、攬吓嘅，我哋拍完套戲好似變咗家人一樣。」她坦言早於公布賽果前半小時，她已接獲羅之短訊，心情興奮得難以形容：「講真，我哋呢啲小成本製作冇錢做大型宣傳，今次攞獎絕對係極佳嘅宣傳方式，我對票房好有信心。」至於片中扮演君如兒子的李治廷則表示，《歲》片得獎是他本周五（26日）23歲「牛一」的最佳禮物。另有份參演的o靚模蔡穎恩（Evelyn）亦表興奮：「第一次拍戲，呢個獎對全Team人都好大鼓舞，我打算去接導演機，賀佢凱旋歸來。」