愛情篇
並不是薑汁撞奶那麼簡單，對上一次情人節撞正大年初一，要追溯到1953年，就像很老套的牛郎織女式愛情，他們必定有緣相會！今個虎年，愛神維納斯終於遇上代表初一的財神，多麼可歌可泣！但杏兒與Bosco這對明明不是天各一方，偏偏要把關係埋藏地底……
畢竟關係已隱密五年，杏兒繼續義無反顧去忍，莫非要等多38年才肯公開？不過她似乎仍很享受，談到這問題，她始終不敢正面回應：「唉！情人節？我想過新年多啲，新年有煎堆有油角，仲有煙花炮仗添！唔使好似情人節淨係送朱古力咁Dry！」她口口聲聲覺得情人節Dry，卻口不對心想收情人節禮物，女孩子的心事又有誰共鳴？
難忘初戀勁Sweet
問到「黃生」是否已準備厚禮送驚喜？杏兒說：「邊個黃生？黃秋生？哈哈！唔一定係佢，可能另有神秘人呢？」Bosco不時被指花心，杏兒都可以忍，不過她還是忍不住透露初戀的甜蜜，更希望「有人」識做：「嗰陣喺北愛爾蘭留學，遇上初戀情人，雖然只係Puppy Love，但男朋友好有心，佢縱使身在倫敦，都特登寄一紮好靚嘅紅玫瑰畀我，喺宿舍收花嘅我見到真係好窩心，一份禮物價格唔代表一切，係講求入面嘅價值，呢份禮物唔需要好貴，但好在乎有冇心思，希望會有人明白呢個道理，縱使佢只係一張手畫嘅心意卡，我都會好喜歡！」問到「有人」是否指Bosco？杏兒腼腆地說：「我想講一樣嘢，就算冇男仔鍾意我，就算唔拍拖，我一樣會過得咁開心！不過我同佢從來冇問題，我哋係螢幕情侶吖嘛，佢仲係我好朋友添！」
事業篇
愛情路上，杏兒百忍成金；但講到事業，她絕不甘做扯線公仔！在電視圈算是吃得開的她，寧願賺少幾個零，也要圓其紅館夢：「做歌手難過做演員1,000萬倍！拍劇會有其他好演員傍住，但做歌手唔同，唱得唔好一聽就聽得出，有時候我會問自己有冇揀錯，但若然杏兒有日可以喺紅館開騷，有人肯聽我唱歌，人一世物一世，我唔理o架！一於勇往直前！」她又說：「總之我唔怕為唱歌犧牲賺錢機會，咁先不枉此生，為咗唱歌，我的確係賺少咗錢！So？我唔係淨係為錢！」
希望把青春留住
曾幾何時，杏兒為拍劇變肥田，幾十磅肥肉不是問題；不過，她現在要歌視兩邊走，纖弱的她但願把青春留住：「呢兩年真係忙到爆，食又冇啖好食，我寧願好似拍《肥田囍事》嗰陣咁日食夜食，我知道食杯麵唔健康，但為充飢又要速食，杯麵成為我嘅正餐，有時我會諗，如果多啦A夢可以借樣法寶畀我，將青春留住，我就可以有足夠體力應付工作！唔知係咪人愈來愈大，依家體力真係大不如前，唔通真係老咗？我唔認命o架！」
近年不少花旦都演而優則唱，可是要數「我真係好鍾意唱歌」的人，杏兒可媲美古巨基：「演戲唔係做自己，唱歌先可以表現真我，人人覺得杏兒係個傻傻哋、好開心嘅女仔……其實相反，我係一個幾負能量嘅人，但只要唱歌就會開心番！」
唱快歌拒行性感
眼前有徐子珊行性感唱快歌，但杏兒竟選擇「多布」路線：「我性感唔到，唔夠女人味，我接受唔到拋胸，搵邊個會睇？所以我會走型嘅路線，會着得多布啲！」做得無綫親生女，杏兒有機會像林峯一樣拿「亞太歌手獎」，但她說：「我邊有咁多Fans吖！我冇可能咁快，頒畀我都唔敢攞。」轉做歌手已兩年，杏兒給自己一個不俗的分數：「我畀自己78分，合格o架喇！可以再做得好啲，我唔敢畀太高分自己，太低分又影響自信心，我仲係好新！絕對唔怕兩頭唔到岸！」
八字夠夾 男遷就女
杏兒與Bosco天生八字是否很夾？據堪輿學家麥玲玲表示，Bosco私底下一定很疼錫杏兒：「杏兒係個比較自我中心嘅人，而Bosco性格比較主動，佢會好願意去遷就女朋友，氹杏兒開心！」麥玲玲又表示肖猴的Bosco今年事業會有大突破，所以工作會比較忙，三年後兩人的感情會更穩定，甚至有機會結婚！
後記：「急」住做訪問
杏兒是否忍得？從以下對話可略知一二，當日杏兒趕入廠開劇，為了盡快完成訪問，她連尿尿也忍：「我都係做埋訪問先，等陣先去都未遲！」記者說：「你解決先啦！就算做電話訪問都OK！」杏兒即說：「唔喇！我想拿拿臨做完訪問，你問啦！我都唔係好急！」可見杏兒的忍功已達神級！