剛從外地返港的曾志偉，昨晚即出席監製的新片《72家租客》團拜活動，提到老友尹志強的追悼會及最後獨處時刻時，他更眼泛淚光！志偉表示尹佬於農曆年廿四、五時已停藥，當時他已看不見及講不出說話，但志偉與譚詠麟等近10名朋友前往探望時，亦得不願見人的尹佬接待，志偉雖說為尹佬流的眼淚已流乾，但提及此事時又再眼濕濕！
志偉說：「收到尹佬消息，我好唔開心！我咁多朋友走，唯獨尹佬走自己冇眼淚，其實對尹佬嚟講係一種解脫！年廿四、五佢已停藥，我去過探佢，當時佢已經睇唔到、講唔到，我哋去到佢都肯見我哋，仲同我哋每個人喺房單獨過咗一段時間，大家好用力咁握住對方隻手嚟感覺，喺房嗰段時間，我已流乾晒眼淚！尹佬患病後期曾搬去大埔住，佢試過喺屋外跑步鍛煉身體，但又怕畀狗仔隊偷拍，搞到佢要匿埋，令身體愈來愈虛弱！」
昨晚8時到場的志偉表示，兩小時前才從尹佬家人口中得知尹佬已火化：「尹佬意願係唔想麻煩人，所以咁樣做咗先！（追悼會由邊個單位搞？）所有朋友都想參與，正通知緊各界，亦曾經打過畀梁漢文，當時佢喺火葬場，要等佢落山再通電話，經商量後，會過咗新十五後（即3月）先搞，餘下嘅嘢都唔急，以大家能參與為原則。（擔心米雪？）當然啦！」