跟金牌大風已約滿的唐素琪（Chelsea），宣布明年初與圈外男友拉埋天窗，她甜絲絲地以C先生來形容男友，她笑說：「我哋拍咗五年半拖，都到咗適婚年齡，今年係虎年，『苦』吖嘛！唔係幾好，所以計劃兔年結婚，結婚係開心事，我鍾意同人分享。」由於還有一年時間籌備婚禮，Chelsea笑言不用太心急，她笑說：「我同男友都唔鍾意好傳統嘅擺酒，我哋會註冊，然後搞個西式Party。」
喜愛小朋友的Chelsea，希望婚後生夠兩個：「梗係想一仔一女湊成個『好』字！」她又計劃進軍兒歌巿場：「我同阿Mark（雷頌德）仲有合約，唱兒歌係佢提出，我好鍾意小朋友，形象又幾適合，都覺得香港好少人做兒歌，想畀多啲選擇小朋友。」她還打算報讀兒童教育課程：「我想從事兒童教育發展嘅工作，結婚後係人生另一個新階段，我會全面轉行，唔會再拍戲或唱流行歌曲一段時間。」
