與米雪（米記）及尹佬感情深厚的黃興桂透露，尹佬去世當天曾與米雪通電話，信念堅強的她表示，因不想於新春期間打擾親友，故會於新十五後才舉辦悼念活動。他又表示會盡量由新加坡返港送尹佬最後一程，並準備了悼詞向尹佬致敬：「尹佬係一個喺任何場合都舉足輕重嘅人，佢嘅態度同EQ認咗第二冇人敢認第一。至於米雪，係我心目中嘅鐵娘子，簡直係Steel Magnolia（鋼做木蘭花），識到呢對男女係我嘅財富！」他又透露米雪對尹佬照顧無微不至：「有一次尹佬狀態唔好，唔想見人，米雪照顧咗佢兩個鐘，幫佢按摩、飛髮、剃鬚同搽潤膚膏，之後我就入房搵尹佬！」他更否認尹佬如傳聞所指只得80多磅：「百分之百唔係！當時佢啲頭髮仲多過我！所以估唔到佢咁快去咗！」
對於有指米雪為尹佬治病花掉大量積蓄，黃興桂說：「呢啲（畀錢）梗係米雪行頭，幾多錢佢唔會講，尹佬住頭等私家病房、又要做手術，多多都唔夠！有一次佢住完院，聽聞埋單過半百萬！」他又表示米雪想盡辦法為尹佬尋訪名醫治病，更曾提議尹佬到現代化療養院：「尹佬慣咗招呼朋友，米雪咁做係想等佢唔好淨係坐喺屋企咁悶，多啲寄託，但因為個地方唔喺香港，所以最後冇去！」