港姐陳倩揚參選時有「翻版黃麗梅」之稱，當年佢真係有啲「C9」Feel，身形圓潤加上髮型，有咁嘅稱號實在入型入格！不過，「士別三日，刮目相看」，依家嘅陳倩揚已經變身成苗條「索女」，小小So前排撞到佢錄影《東張西望》時都眼前一亮，忍唔住大讚佢身材弗爆！
小小So：「麗梅姐」，你比參選時弗咗好多喎！因乜解究呢？
陳倩揚：唔好笑我啦！都係靠做運動跑步。
小小So：你又要開工，邊有咁多時間呀？
陳倩揚：抽到時間都會盡量去跑，為咗就時間試過朝早五、六點就去跑步添！
小小So：嘩！晨運呀！除咗運動，仲使唔使節食?
陳倩揚：就係因為忍唔到口，所以先要做咁多運動！我情願揀運動去減肥囉！自己最鍾意就係食嘢，依家都食好多嘢㗎！完全冇戒口。我覺得減肥最緊要有恒心，仲要減得健康，做運動就最好喇！
小小So真係好佩服陳倩揚咁有恒心去做運動，真係抵佢愈嚟愈靚，小小So覺得如果佢今年先參加港姐，攞冠軍都有份！