各處鄉村各處例，各人於農曆新年期間都有不同的習俗，晶女郎孟瑤每年年三十晚都會穿着紅色內褲度過：「好細個已經有呢個習慣，媽媽都會同我一齊着嘅！當晚一踏入十二點，我哋就會拎住條新嘅紅底褲喺火爐上烘，因為話咁樣做成年都會好旺好好運！」問到最豐收一年曾攞過多少利是？她笑說：「唔係好多，讀書時最多有三千蚊，多數都係家人畀，但出嚟工作之後，就係我畀番屋企人喇！（會同王晶拜年？）我會打畀佢！（向佢攞利是？）冇啦！係我畀番佢！因為佢生日，不過之前我都已經送咗支紅酒畀佢做生日禮物！」
孟瑤笑指因沒有情人的關係，農曆新年會與家人共度：「我會請屋企人去韓國旅行，會去一個星期，可以喺第二個國家過新年，感覺都好新鮮！（想搵番個男友？）都好，不過依家唔係特別恨拍拖，都係專注番工作先。（未來工作？）過年後會拍晶哥齣新戲，另外仲有幾齣戲傾緊。」談到新年願望，孟瑤希望家人及朋友身體健康、工作順利，她又祝讀者虎虎生威、新年發大財！