無綫女藝員李思欣牛年又拍劇又接廣告，發展不俗，展望虎年，她表示有朋友為她占算過，將會桃花大旺，所以初二的開年飯，她希望能開個好頭，全年行好運！
思欣說：「我屋企嘅習慣係初一去阿爸嗰邊啲親戚度拜年，初二就輪到同媽咪嗰邊啲親戚拜年，年年初二我哋都會去舅父屋企拜年同食飯，舅父屋企有個好靚嘅維港煙花景，我哋年年晚飯後都會圍埋一齊睇煙花，好好氣氛。（新年願望？）有朋友幫我睇過紫微斗數，話我虎年會有超多桃花，我聽到好開心，做藝人好需要桃花，觀眾緣吖嘛！（情人節過得點樣？）我唔算好重視情人節，我知下一個初一同時又係情人節，要等38年咁耐，但今年情人節同以往一樣，冇乜特別難忘事，都好嘅，我有38年咁長時間去等，下一個年初一情人節一定好難忘！」