本文重點
96年2月15日，張學友和羅美薇訂下盟誓，今天是他們結婚14周年兼大年初二的特別日子，學友笑言送鮑魚好過送鑽石！
學友向本報讀者拜年，對於今日的結婚周年紀念，他笑說：「多數會丟低兩個女，同太太二人世界，都係食吓飯，冇乜特別慶祝，一切從簡。」
愛的宣言在心中
他更沾沾自喜地自爆有一年送鮑魚給太太作禮物：「係咪好浪漫呢？佢鍾意食鮑魚，所以咪送囉！（應該送金銀珠寶？）鮑魚升值快過鑽石呀！送乜鬼吖！諗唔到有乜可以送，可以喺埋一齊就OK，係人都知我唔浪漫！」
至於會否給太太製造驚喜？學友自嘲：「驚就易，喜就難，驚到跳起嘅起就有。」還拉老婆落水說：「不過我比老婆細心，佢唔記得邊年結婚。」問到有否愛的宣言？學友深情地說：「在心中。（揀首歌送畀老婆？）《迷你》啦！因為佢細粒。」昨日大年初一，學友一家四口依照習俗，跪地向母親叩頭拜年，祝媽咪身體健康，他說：「囡囡都要跟我同老婆叩頭拜年，初初佢哋都唔肯，但呢個傳統我梗係要佢做。」