今日大年初二，容祖兒與古巨基相約到御廚楊貫一的新店豪擦價值26,880元的開年飯！面對滿枱吉品鮑及魚翅等名貴菜式，基仔夾起大大隻吉品鮑時興奮地說：「嘩！『阿凡鮑』，好3D！」祖兒還獲一哥贈言「臉食四方」，她即開心地說：「一哥識睇相，我一直視塊面為缺憾，點知原來自己唔識貨，今日開始我會鍾意自己多啲。」
提到虎年大計，祖兒表示有意進軍影壇：「今年30歲喇！踏入人生新階段，以前一心一意做歌手，拍戲未得到好滿意嘅成績，係時候進軍影壇。不過我對唱歌仲有雄心壯志，未攞夠獎o架！我只係想試吓做戲，希望喺隨意同冇壓力下完成。（目標做影后？）暫時首要係導演對我有信心先！」
而剛榮升老闆的基仔，希望今年開三間分店，唱歌方面能出三張碟：「演藝事業交晒畀英皇，我非常有信心！今年預計出兩張廣東、一張國語碟。（咁多？）公司覺得我啲碟好聽囉！有得出要好好把握！（結婚呢？）依家畀工作包圍，未有其他計劃，但唔可以講咁實，將來可能閃電結婚。」基仔還自度一對Gag聯送給自己：「本人好有事業心，婚姻大事慢慢斟。」