歌神張學友最近推出新碟，為苦等多年嘅歌迷解渴，小小So見到學友無論出席大、小宣傳活動，完咗之後都總有一條長龍等佢合照，咁樣就明白學友點解喺咁嘅唱片市道下，仲自資7位數出碟，當然佢係有十足信心賺得番啦！雖然話實力夠撐，但設計封面上學友都落足心機，而且仲好識講笑。
學友：個封面以金色同黑色做主，連貫啲，仲好有玄機o架！
小小So：係咩呢？
學友：見唔見前面有頁金色反光？可以反映到我隔籬半個樣，咁就係另一個我喇！
小小So：哈哈！歌迷望埋去有「合照」添！
學友：你見唔見最後都有一頁？呢頁仲厲害呀！
小小So：反映到啲字咋喎！
學友：梗係唔係咁簡單啦！你望吓，係咪見到自己個樣呢？哈哈！係畀你聽完照吓自己個樣，成個人靚晒。