14/02/2010

播放本新聞相關短片

阿Sa在甜在心

蔡卓妍(阿Sa)出道時形象青春健康,是不少少男的夢中情人,雖然她已有緋聞男友鄭中基,但外界表現受落,無損「Sa迷」對她的愛戴。而近年阿Sa形象漸趨成熟,女人味爆燈。阿Sa早前榮登男、女網友投選「最理想女性情人」冠軍,男網友喜歡她性格樂天、笑臉迎人;而女網友則愛她形象正面及擁有甜美外表,「男女通殺」,果然魅力非凡。

與William同屬天蠍座的阿Sa表示,自己優勝地方,在於為人開朗樂觀:「兩個人拍拖,最緊要開心,所以我經常保持呢種心情。(為人細心?)我慣咗對人細心,好似細個讀幼稚園,我會嗌同學仔做BB,我好鍾意照顧佢哋,雖然嗰時自己都係BB,但我會餵佢哋食飯,行樓梯又會扶實佢哋。」

阿Sa雖然工作忙碌,但她閒時十分享受入廚樂,名副其實「入得廚房、出得廳堂」,阿Sa笑言做她的男友極有口福,她亦愛炮製美食冧情人:「我煮嘢食都幾叻,西餐、中餐、泰國菜同日本餐都識整,雖然唔係乜嘢好勁同埋好有特色嘅美食,但至少我整得唔難食,以前啲男朋友試過都讚不絕口,佢哋好欣賞。(鄭中基試過未?)咁又冇喎!」

難忘炮製心形蛋糕

雖然已身為萬人迷,但阿Sa仍與不少時下女人一樣,認為情人節是一個相當緊要的節日:「相比起生日同埋聖誕節,我反而覺得情人節夠晒紀念性,因為會睇到另一半對自己嘅心思。(你啲情人十隻手指數晒?)係呀!」阿Sa不諱言也渴望在情人節收花,但她會以「慳儉」為大前提:「情人節係應使則使,(燭光晚餐?)我都鍾意,以前亦試過喺沙灘漫步拍拖,呢啲都係指定動作。」問到情到濃時會否與男友咀嘴,阿Sa即故作神秘,不置可否說:「唔話你聽!」談到最難忘的情人節,阿Sa說:「有一年未入行,嗰時情竇初開,自己整咗個士多啤梨心形蛋糕送畀男友,依家諗番都覺得好娘,其實嗰時我將啲士多啤梨切成心形,然後鋪到成個蛋糕都係。(嗰時男友反應點?)佢梗係讚啦!唔夠膽唔讚啩!」

朱古力冧初戀男友

除了炮製心形蛋糕顯心思外,阿Sa還試過發放「朱古力攻勢」冧仔,她甜笑說:「嗰時買咗大包朱古力,只係抽晒深啡色同紅色糖衣嘅朱古力出嚟,然後去傢俬舖買個玻璃樽,將呢兩隻色嘅朱古力放入個樽,然後用咗好多時間,砌咗個心形出嚟,送畀我初戀男友,嗰時真係砌到我嘔,但佢收到之後開心到爆!」雖然與初戀男友已成過去式,男方亦已有要好女友,但兩人仍保持聯絡,阿Sa說:「之前我出書,想搵番晒以前啲嘢,我就問佢有冇保留以前啲相,尤其係呢個心形樽嘅相,原來佢真係有Keep住,仲將我哋以前寫嘅信,搵個盒裝起,保存得好好,我好多謝佢幫忙。」

原來阿Sa的細心,更顯出過往的男友未夠浪漫,當她得知William的冧女招數層出不窮,即狂呻:「點解我識親啲男仔都唔夠浪漫o架?我覺得自己浪漫o架,可能我未同過天蠍座嘅男仔拍拖。」原來阿Sa曾收到一個男裝銀包,作為情人節禮物,她說:「嗰時個男仔唔得閒買禮物,搵佢阿媽幫手買,佢阿媽以為買畀佢個仔,所以買咗個男裝銀包,跟住個男仔將銀包送畀我。(收到之後感覺如何?)唔係咁開心囉!其實呢個係心意,唔一定要名貴禮物,至少畀我Feel到誠意。」阿Sa不諱言此事或多或少影響到雙方感情。

紅Bra紅底送牛迎虎

適逢今年情人節撞正年初一,她說:「我會同屋企人過,都好開心,佢哋(指家人)都係我情人。」她自爆會狂買紅Bra及紅底「送牛迎虎」:「我同化妝師會買全新紅色內衣及內褲,(會唔會着o架?)梗係會啦!(桃花運?)OK啦!我想事業運旺啲,屋企人冇向我催婚,我仲會準備五位數利是派畀同事,攞個好意頭。」

William與阿Sa在新戲《美麗密令》中結片緣,兩人有不少對手戲,談及這個型爆師弟,阿Sa亦對他讚不絕口:「雖然佢細過我,但佢好成熟,好勤力,而且好玩得同跳得。(佢係好情人?)我諗應該都唔會差得去邊。(你算係完美情人?)咁又唔算,我係事業型女性,我好鍾意工作,但如果唔使做嘢嘅話,我都會畀多啲時間屋企人或朋友,愛情反而放到最後。呢個階段我想為事業去衝刺同拚搏,而且做得我男朋友,就要容忍到我因為工作,而未必有時間陪佢,雙方都要體諒大家,我認為拍拖最緊要感覺一致。」阿Sa坦言將來會結婚生仔,但計劃可能要到35歲後,即至少再多等七、八年,她笑說:「我依家享受我嘅事業同生活,有時都唔知自己想點o架,到時先算啦!」