外形高大健碩的William,憑一身結實肌肉及出色「舞」功,冧暈不少「霆迷」,火速成為人氣偶像。而William與Angelababy的戀情,本來亦為外界受落,但最近這對情侶已「降格」為朋友,雖然今年要過單身情人節,但William不愁寂寞,他會做孝順仔陪家人過年。即使沒有愛情滋潤,但他近日桃花旺盛,先後與G.E.M.及鍾欣桐鬧緋聞,女人緣爆燈!
沙灘示愛搞喊女友
談及對情人節的感覺,William說:「好似過年習俗咁,有啲儀式係一定要做,譬如送花、送朱古力同埋食燭光晚餐,雖然可能係指定動作,但女仔始終係受呢套嘅!」William除了會做「指定動作」外,屬天蠍座的他原來計仔多多,冧女招數層出不窮,為她們炮製驚喜。William不諱言女朋友的數目,十隻手指已經數得晒,他還憶述最溫馨難忘的情人節:「有年情人節,嗰時仲讀緊書,我畀女朋友驚喜,當日我先約咗全班宅男,去鴨寮街買十幾盞手提大光燈,跟住夜晚就同佢哋去石澳沙灘,我先喺沙灘上寫咗『I YOU』,而成班朋友散水匿埋。跟住我就同女友一齊行沙灘,到嗰個位之後,我就畀Signal我班朋友,然後着晒所有大光燈,十幾盞燈圍住我兩個,我女友感動到喊,跟住仲起哄『打車輪』,真係幾浪漫!之後我要勁請班朋友食飯,但係值得嘅。」
William透露每年情人節,若有情人的話,都會送花及小禮物給另一半:「最緊要心意搭夠,試過最貴係送名牌手袋。(煮嘢食冧女?)我唔識,我係煮食白癡。」
親手砌模型表愛意
除了在沙灘炮製驚喜外,他還試過使出「花」招「模」式冧女友,認真心思縝密,他說:「試過去唔同地區嘅花店,各買一支玫瑰花,然後集齊99支玫瑰花,再送畀女朋友。佢收到嗰陣起初唔信我去咗99個地方買,我就即刻攞成疊單據畀佢睇,其實氹女友或者買嘢送畀佢,唔一定用錢衡量,有時要付諸實行,用行動同心思去表達誠意同愛意。」William續說:「我之前有個女友,好鍾意砌模型,尤其鍾意高達,我用咗幾個月時間,砌咗個超大嘅模型,然後喺情人節送畀佢,佢以為我買番嚟,唔信我自己砌,跟住我索性拆咗模型隻手,再喺佢面前砌畀佢睇,直到佢相信為止。」
談到今年要度過單身情人節,William坦言不會感到寂寞:「都唔會嘅,我依家寄情工作,歌影視已佔據我嘅生命,冇情人好啲,因為有情人嘅話,要投放好多時間同心機,依家我工作真係好忙,忙到冇時間拍拖。(睇到人哋一雙一對會唔會酸溜溜?)一定唔會,但以前拍拖我會睇樣,但入行後,樣貌反而其次,性格同夾唔夾先最重要,身材就更加擺到最後。」
雖然William為人細心,但他原來相當大男人,他說:「我係大男人型情人,一定唔鍾意女朋友着低胸同超短裙,驚佢哋被睇蝕,以前試過有個男人不斷(目及)住我女友,我當堂同對方嗌交,女友即時『O嘴』!」
愛情專家教人追女
William的戀愛經驗尚算豐富,問到是否「愛情專家」?他笑說:「最近好多朋友都問我有關愛情問題,問我點樣追女仔,佢哋成日話我好多女朋友,我話唔係,佢哋講極都唔信。我試過幫朋友解決愛情疑難,提供過好衰嘅方法教路,有個男仔鍾意咗個女仔,但女仔又唔鍾意佢喎!我就建議個男仔喺公園Set個Game氹女,點知度極都氹唔到,後來我叫個朋友,不如試吓揸架車出嚟接載女仔,點知咁就得咗,其實唔同人要用唔同方法啦!(你係專一男人?)我專一o架!但個樣生得花心,言行舉止又容易惹人誤會,啲人一見親我都會有花心感覺,以前唔慣,依家就慣晒。」


