何鴻燊會否出院返家過年一直成為全城焦點，由於近日天氣驟冷驟熱，為令他有更好的休養環境，三太陳婉珍日前已確認指賭王未能出院，昨日何家成員亦表示賭王也決定留院較好。為讓各界人士安心，昨日傍晚賭王透過司機向在醫院守候的傳媒派發他最新的照片及新年賀辭。照片中，賭王精神不錯，身穿白色毛衣，配上紅色的Hermès圍巾。
隨照附上一篇約三百字的新年賀辭中，明顯見賭王依然不失幽默，以「今年係虎年，但係一啲都唔『苦』，因為老虎咁威猛」作開場白，更細心體貼的關心各階層，十分應景的以虎為主題來發揮，自度啜核賀辭（詳見附文)！
提女士睇實丈夫
除了首尾呼應祝賀港澳經濟起飛，虎躍龍騰外，出名對太太照顧入微的賭王，更妙論身為妻子的，要好好睇實另一半，十分有趣！又勸喻學生努力讀書，不能虎頭蛇尾。而為促進澳門的賭業，賭王幽默地「呼籲」市民玩俗稱老虎機的角子機，在新年大發特發，最後祝社會「虎虎有生氣」作結。
妻女紅噹噹探病
雖然賭王未能出院返家吃團年飯，但病房依然熱鬧，賭王毫不寂寞，何家成員更指已在病房布置賀年飾物！而昨午一時起，二太藍瓊纓、女兒超儀及丈夫陳子聰等陸續到達醫院探望賭王，逗留約四小時才先後離開。
之後由一身紅色運動服、笑容滿面表示預備鮑魚給賭王享用的三太陳婉珍接棒，三房長女超雲及幼女超蓮也分別到達，超蓮以紅色大褸現身，並拿着膠玫瑰，她透露帶了牛肉飯予父親：「花係尋日行年宵買嚟送畀爹哋，（三太話有鮑魚？）好似冇，費事引誘爹哋。（男朋友唔嚟？）費事。」而賭王與元配的女兒超雄則帶來沙灘波，換上新髮型的四太梁安琪則在下午一時離開醫院，表示要趕往澳門。
賭王新年賀辭
今年係虎年，但係一啲都唔"苦"，因為老虎咁威猛，港澳經濟將會 "如虎添翼"，"虎虎生威"！
做生意嘅，"虎嘯風生"，大展鴻圖！
讀書嘅，要出盡"九牛二虎之力"，千期（祈）唔好"虎頭蛇尾"！
做太太嘅，要"虎視耽耽"睇實老公，因為老虎多數鐘（鍾）意夜晚出去搵食。
虎年想發新年財，最好嚟探下（吓）我喺澳門養嘅老虎仔，有成幾千隻等住你去餵，等佢哋食飽飽，自然會送個大JACKPOT俾（畀）你，等你過個肥虎年！
最後，我祝經濟"虎躍龍騰"，人人"龍精虎猛"，社會"虎虎有生氣"！