有「香港寫真o靚模女王」之稱的周秀娜(Chrissie),與拍拖三年的男友Avis慶祝情人節兼大年初一,更分享男友的「冧娜」三式!
第一式借衫變裝
今年大年初一適逢情人節,Chrissie與男友Avis共享浪漫大餐,更大讚套餐中的松露輕煎帶子又大又鮮甜,希望來年更甜蜜!Chrissie以紅噹噹造型谷盡32D上圍,在桃花樹下顯得更美艷動人,令男友當場冧爆。她難忘有年情人節悉心打扮,怎料Avis竟以「牛仔Look」接她,她說:「當時見到佢嘅打扮真係好愕然,佢仲話冇Book位,要去大牌檔,但其實佢訂咗間好靚嘅餐廳,諗番個驚喜都覺得幾開心!」她還甜笑補充:「由於嗰間餐廳有類似『衣衫不整、恕不招待』嘅條款,所以佢借咗侍應嘅恤衫同西褲嚟着,件衫嘅Size完全唔啱佢,見到佢用刀叉時『就住就住』個樣,真係諗起都想笑!」
第二式鬼馬送套
工作密麻麻的Chrissie,坦言現時已甚少時間陪男友及家人,令Avis慘變她的「背後男人」,她說:「上年忙到連瞓覺嘅時間都冇,有時冇精神諗嘢,佢就幫我搞掂晒啲瑣碎事,好似之前我部電話Short Short哋,但又冇時間睇新機,佢於是靜靜雞買咗部iPhone畀我,唔只Set好遊戲同來電鈴聲,仲膽粗粗問我經理人攞年曆相去整保護套,收到嗰陣真係覺得好Warm,好多謝佢!」
第三式耐心撲火
大頭蝦的Chrissie有次遺失男友送的iPhone,她說:「有次搭的士唔小心漏咗部電話喺車度,但佢冇怪我,仲掉轉頭安慰番我,話冇嘢唔公開得,叫我唔使咁唔開心,嗰刻真係好感動。」現時她使用的iPhone同樣是由Avis所送,Avis說:「其實佢唔見咗第一部都有啲嬲,但見到佢咁忟同唔開心,又唔捨得話佢。不過,電話對佢嚟講好重要,佢又話過iPhone好用,所以決定買過部畀佢。」






