吳雨霏（Kary）早年與三位拍檔組成樂隊「Ping Pung」，但自04年後未有再出碟，她強調Ping Pung並非解散，更期望有重組一日：「其實我哋冇停過合作，佢哋一直有幫我監製同作曲。」不過與此同時，她卻誓要Rock番夠本！她笑說：「我會同四人樂隊Hardpack合作，不過唔係組新Band，我好細個已經識佢哋，都係全男班。」她承認熱愛組Band玩搖滾：「入行後試過唔同類型嘅音樂，覺得最好玩都係Rock，既然公司肯投資，又有機會玩Band，梗係開心，我已經學緊結他，同佢哋一齊寫歌。」
拒出水着寫真
Band Sound在香港並非主流音樂，而Rock女更是少之又少，Kary說：「以前Ping Pung唱過唔少Band Show同Bar Show，累積到一定經驗，算係訓練有素。」不少Band友藉搖滾樂宣洩不滿情緒，她亦十分認同：「雖然我性格樂觀，但人總有唔開心嘅時候，加上工作壓力，心裏面都會有好多不滿，有時未必可以同朋友、家人分擔，自己講嘢又唔叻，又唔鍾意開口怨，咪藉音樂發洩囉！」
Kary澄清玩Band不代表個性反叛：「我唔算反叛，但有自己主見，有時會主觀咗，但唔想做嘅嘢，我一定會企硬。」不過，她強調願意聽取別人意見：「我盡可能都會同公司互相遷就，但有啲嘢就會堅持，例如唔出三點式寫真集，呢啲唔得囉！」
再戰舞台劇
過去一年，Kary滿意成績，她說：「因為金融海嘯影響，唱片業不斷萎縮，但我都做到一張自己想做嘅唱片《Keep Breathing》，帶出一啲正面訊息，畀大家鼓勵。」去年的舞台劇演出，更令她有不少得着：「一個舞台劇要兩個月時間排練，又唱又跳，對Live表演好有幫助，令歌手有進步空間，有機會都好想再做！」
男友放心底
Kary與「網球王子」洪立熙已是公開的一對，但每次提及男友，她都十分低調及避忌，她說：「我唔想講太多感情生活，始終工作同私人生活應該分開，我唔係刻意去避，但希望順其自然。公司畀我好大自由，從來唔會干涉我嘅私人生活，最緊要係唱好歌，拍拖令感情生活變得豐富，對唱歌都有幫助。」