令街頭文化在國際時裝舞台上發熱發亮的鬼才設計師Alexander McQueen，前日早上在倫敦寓所上吊自殺，為短暫的創作生涯畫上句號。McQueen的遺體前日下午由救護車運離寓所，警方調查後指死因冇可疑，但有消息指他手上有傷口，估計他並非首次自殺。McQueen母親上周二逝世，昨日出殯，有傳他不堪喪母之痛而走上自殺之路。McQueen逝世的消息公布後，大批Fans湧到其寓所及店前獻花，一名自稱McQueen男友的金髮男子，更在McQueen家門前嚎哭。

大批Fans在McQueen的店舖前獻花，向這位一代鬼才作最後致敬。(美聯社圖片)	(美聯社圖片)	母親的逝世令McQueen深受打擊。(美聯社圖片)

McQueen英年早逝，本地多位時裝達人亦深表哀痛，身在北京的容祖兒向來鍾愛McQueen品牌，新碟其中一個紅色毛毛造型是他的作品，而去年出席《叱咤樂壇頒獎禮》的戰衣亦是他的得意之作，祖兒說：「咁有天分嘅人過身，係時裝界好大損失，佢嘅作品剪裁好有風格。」對於有傳McQueen不堪喪母之痛而自殺，祖兒說：「佢好孝順，但可能用錯方法，不過做得Designer都比較感性，可能一時諗唔開。」

向來鍾情McQueen設計的祖兒，去年穿上其作品出席頒獎禮。資料圖片	關之琳與黎明均曾穿上McQueen的設計出席公開活動。資料圖片	黎明

蘇永康支持15年

至於與McQueen同樣是40歲的黃偉文（Wyman）則表示，對方的逝世等同一個時代的結束：「鍾意時裝嘅人都鍾意McQueen，佢係英國國寶級時裝設計師，佢呢兩季嘅設計我都好鍾意，佢留低咗個好回憶畀大家。McQueen係天才，設計好有舞台Feel，又有天馬行空嘅創作理念，華麗得來又摩登。我真係唔知關唔關Isabella Blow（發掘McQueen的伯樂，於3年前自殺身亡）事，我唔知佢係自殺定出意外，如果真係自殺，原來真係會傳染。」已訂購McQueen春夏新裝的他，打算致電香港時裝店多訂幾件衫及袋。

另外，潮媽陳慧琳認為McQueen之死是時裝界的巨大損失：「好多事都有好多方法解決，唔一定揀呢條路。」梁詠琪亦深表可惜：「McQueen太叻、太有才華，可能因為太專注自己作品，反而忽略咗內心深處，其實佢都需要人關心。」蘇永康則表示自95年起已穿McQueen的作品：「近年都有買佢嘅衫，將來都會繼續買，佢係我心目中嘅奇才，希望佢去到另一個空間會開心，相信McQueen支持者會永遠記得呢個時裝大師。」他大讚2010年冬季系列是McQueen最精彩的作品。

葉梁美蘭盛讚奇才

至於身為超級Fans的名媛葉梁美蘭哽咽說：「McQueen媽咪嘅死對佢打擊好大，但佢好後生，做乜咁激動？依家時裝界嘅鬼才冇乜幾多個，佢同Marc Jacobs都上位，做乜自殺？做得時裝都係感性人，何況佢係一個奇才？真係好惋惜同心痛！」她大讚McQueen的設計風格獨特：「個牌子冇咗佢等於冇靈魂，之前仲諗住3月去巴黎睇佢個騷，依家可能取消行程。」