要享受農曆新年假期，出外旅行是不錯的選擇，謝安琪和鄧麗欣卻各走極端，前者想到火辣辣的布吉，後者則希望到環境清幽的芬蘭或冰島，各有各好介紹！
歌手謝安琪（Kay）
「我聽同事講話布吉好正，旅費唔貴又舒服，其實香港嘅新年咁熱鬧，可以試吓去呢啲清幽嘅地方過，細個同父母去過布吉，覺得好浪漫，住嘅別墅有私人泳池一定仲正！如果留港就可以行花市，因為我住大埔，我好鍾意行大埔花市，雖然係細啲，但啲花好新鮮，大部分嘅花農都喺新界，不過我都會去維園，有一年去維園賣帽籌款，今年都可能會去o架！」
歌手陳偉霆
「我係蘇梅島常客，新年有長假我推介去當地Relax吓，嗰邊有好多外國遊客度假，氣氛好好，啲嘢又好食！」
歌手鄧麗欣（Stephy）
「新年我想去啲好凍嘅地方，好似冰島或者芬蘭都係好推介，睇過啲旅遊書，覺得好浪漫，充滿異國風情，我有年去加拿大過節，氣氛仲勁過香港，啲商場同香港嗰啲差唔多，都好多唐人，佢哋仲會派利是。」
Amusic新人李治廷
「我推介去澳洲，因為2月香港仲係好凍，澳洲就係夏天，加上我鍾意陽光與海灘同埋水上活動。」
名人黃伊汶
「我推介留港去嘉年華，不過唔知今年仲有冇，以前我同一班朋友去玩機動遊戲，好開心，如果想靜靜哋就可以去昂坪360，或者去大嶼山拜大佛都唔錯，而且求神同新年都好啱Feel。」
模特兒Mandy Lieu
「我之前年年都喺馬來西亞過新年，嗰邊同香港一樣有舞獅，仲會燒炮仗，好似一般中國嘅Chinese New Year，我又會拎啲柑同朱古力去朋友屋企拜年，好熱鬧好開心。」
模特兒傅嘉莉
「試過新年去韓國，當地新年有好多特價嘢賣，同埋佢哋鍾意買新一年嘅月曆同記事簿，湧住咁去買，好搞笑！不過我今年可能會去泰國做嘢，想去嗰邊嘅唐人街，佢哋都會派利是，不過淨係用張紅色嘅紙包住啲錢，好特別！」
