上月28日舉行婚禮的Roy與阿Yu，昨日到尖沙咀一間上樓大型診所，診所廣播指阿Yu將會見一位姓岑的婦科醫生。身穿鬆身斗篷的阿Yu雖未見肚，但明顯樣子疲倦，即使以慢動作走路亦要老公攙扶，還不時挨着他的膊頭休息。等候期間，兩公婆仔細翻閱「孕婦需知」，又不時互望甜笑，似乎對「喜訊」甚為高興！

等候見醫生期間，阿Yu與Roy仔細閱讀「孕婦需知」。

翹着Roy的「準媽咪」阿Yu，露出幸福笑容。

唔怕BB小器

記者事後致電Roy，他親口承認阿Yu已懷孕：「上星期先知有咗，不過我哋結婚嗰陣真係未知呢個消息，結完婚我哋仲不設防，係最近阿Yu見暈唔舒服，去睇醫生先知原來禁慾前已經『中咗』，依家大約係兩個月，感覺勁過結婚好多，勁開心，可能係神嘅安排！（公開唔怕BB小器？）我哋信耶穌嘛！唔怕，上帝會托住BB！」他還指阿Yu大肚後變得「躁底」，更不時口吃兼失神。

因害喜而不適的阿Yu，挨着老公肩膊休息。

阿Yu搭扶手電梯時雙手護肚，而Roy亦肉緊地回望她。

婚宴如期舉行

由於不能太操勞，在Amusic任職形象顧問的阿Yu已提出轉為Freelance形式，阿Yu說：「呢份工作成日要拎衫、還衫，但我唔可以拎太重嘢，所以轉個形式返工。（做媽咪心情如何？）心情有啲矛盾，因為真係好唔舒服，想嘔又嘔唔到，個人又暈又虛，終於明白媽咪真係好偉大！不過我照完超聲波，見到個BB得花生仔咁細粒，真係好奇妙、好開心！」二人原定4月2日舉行的婚宴將如期舉行，並已訂好酒店，以自助餐形式招呼親友。