身為「九十後」歌手嘅鄧紫棋（G.E.M.），對音樂滿腔熱誠，又鍾意上網同Fans溝通，仲時不時會將新歌放上YouTube，宣傳方法夠晒潮，吸引到大批年輕樂迷「芒」實個電腦睇吓有冇新片，單係上年，G.E.M.喺YouTube「整色整水」嘅搞作，已經合共吸引到1,200萬人次瀏覽，呢股「九十後」新勢力果然唔講得笑！
除咗喺網上自我宣傳嘅方法令樂迷勁Buy外，G.E.M.亦深知做歌手要聲色藝俱全，自從上年開完處女騷之後，由細到大都好為食嘅佢，突然自發性減肥，經理人都還得神落！依家愈來愈上鏡嘅G.E.M.，已經戒飲可樂，又每星期排舞，以前成日都要着Leggings遮「粗腿」，依家間唔中都會改着吓短褲仔，小小So見佢咁好成績，打去八吓佢有咩減肥心得，佢話：「食少啲忍吓口囉！自己肥底，都唔想嚇親人o架！呢期我仲鍾意做Sit Up，真係Work喎！仲減埋個胃腩添！」