在電影《全城熱戀熱辣辣》飾演工廠妹的Angelababy，為增添鄉土味，去年特別到北京郊區取景，拍攝時Baby更不施脂粉，凸顯其清純一面，她透露原定導演夏永康要求她把「大眼仔」除下，貪靚的她最終以近視作藉口才得以保留。

Baby將銀幕初吻獻給內地演員井柏然。資料圖片	Baby透露到內地拍戲，最令她尷尬是如廁問題。	Baby與William的緋聞傳個沒完沒了，撲朔迷離。資料圖片

談到拍攝難忘事，Baby尷尬地說：「去廁所囉！因為得兩塊板整住，下面就係啲糞便，憑去廁所嘅聲音，估計下面堆積有成半層樓咁高，真係好難頂，所以我都係去過兩次，大便就忍到返飯店先去。」Baby笑指經過今次體會，下次會帶備紙廁所同行。

拒認花心女

片中一場與內地演員井柏然的蜻蜓點水式親吻戲，Baby透露此乃導演臨時加插，不過她認為是劇情需要，故最後亦有接受，幸而只拍了三次便順利完成。

問到若被要求拍攝激咀戲又如何？Baby笑言要看對手及劇本才作決定，那William又能否接受？Baby笑說：「有冇新鮮啲o架？（因為咀過？）唔係，我冇講過，傳緋聞咁耐都悶，咁如果導演有好劇本安排都冇辦法，但最好就唔好囉！畀我揀就揀木村拓哉，因為佢係我嘅偶像。」

去年在模特兒界及電影工作作雙線發展，Baby直言拍戲感覺新鮮，由於非天橋模特兒，所以不會視為終身職業，但拍戲則可以長久，被取笑喜歡新鮮感的她，絕對有條件當花心女，對此Baby呼冤：「唔係，我對感情十分專一。（有傳William初戀係你喎？）一定唔係，我初戀發生喺12歲，係一個上海男仔，但都只係去過兩次街同拖過一次手就完咗。」