女子組合HotCha早前放5日大假，各自陪家人及朋友去玩，她們表示平日很留意日本流行資訊，正計劃結伴赴日掃潮物，還向J2台旅遊節目《登陸日本》主持鄭家輝取經，為日本之旅作準備！
Regen自爆去日本不但為Shopping，更試過刻意去見偶像，她說：「以前好鍾意日本女子組合Speed，有年特登飛去日本兩日一夜睇佢哋嘅演唱會，氣氛好正！」她坦言行程很趕，但值回票價。
至於Winkie則最愛逛原宿竹下通，更經常執到「筍貨」，她雀躍地指着鄭家輝的毛毛外套說：「我喺竹下通都搵到件好似o架！1,700日圓咋！大約150蚊港紙，好抵呀！」鄭家輝忍不住笑說：「吓！我呢件都係千幾，不過係港紙呀！」Winkie立即補鑊，讚他的外套毛毛柔軟及Cutting不同，十分搞笑！