國際級日籍名模富永愛（Ai）05年做咗媽咪，佢個仔就快五歲，一般貪靚嘅女人生完BB後都好心急收身，但偏偏Ai就例外，見佢仲保留住小肚腩，但係以佢179cm嘅身高，行騷又唔係好覺，早排佢嚟香港行騷，小小So都有去睇，咁耐冇見Ai，佢真人的確肥咗，但亦靚咗。Ai同小小So講，覺得自己以前太瘦，反而對依家嘅身形好滿意，唔介意有肚腩，仲覺得呢啲係做咗媽咪嘅福（腹）氣添！佢話有肉地會增加女人味，所以喺台上行騷都唔會刻意收腹。
小小So：今次嚟香港行騷，對香港印象點？
Ai：香港時裝周規模好大，好驚訝，好開心可以參與。
小小So：下次再嚟？
Ai：好想再嚟行騷，我大部分時間喺日本，而日本同香港好近，唔使離開太耐，可以多啲時間陪仔仔。
小小So：最欣賞邊位內地或者香港模特兒？
Ai：我幾欣賞內地名模莫萬丹，我同佢第一次見面係幾年前喺巴黎時裝騷後台，之後喺東京時裝騷撞到，今次嚟到香港又再見番，我哋都幾有緣，又傾得埋，睇好佢。