涉嫌毆打女友鄺敏慧（中巴）的Amigo一直避不見人，但前晚約八時許，本報記者發現他與無綫高層陳志雲（陳總）到尖沙咀富豪酒店食飯，但Amigo全程悶悶不樂，相比早前在警署企定定會見傳媒，心情明顯沉重。當記者上前拍照時，Amigo亦要待陳總開聲叫「企定定」後，才肯停低合照。

手持數張紙張到書局傳真的中巴，全程頭耷耷。

中巴迅速返回寓所，絕口不提崔建邦。

經濟冇問題

期間戴上Cap帽及口罩的Amigo不發一言，記者的提問全程由陳總代答。問到心情如何時，陳總說：「佢心情OK！（係咪傾復出大計？）唔係，普通食吓飯！（中巴話好後悔同佢一齊？）唔好講呢啲嘢！」其後他們步行往附近的日航酒店，逗留約一小時後，陳總送愛將返回九龍塘寓所。

事後陳總接受電話訪問時透露，Amigo近日情緒不穩兼心情大受打擊：「因為有報道話佢欠卡數，佢唔明點解仲有咁多負面報道！不過，佢遲啲會去海地太子港做義工，其實之前佢已經計劃去非洲同印度做義工，當佢知道海地因為地震需要好多義工幫手嗰陣，就決定起程去當地！（復出做《勁歌》？）冇咁嘅事！佢經濟亦冇問題，因為佢之前不停做嘢！」

鄺敏慧封嘴

另外，連日來高調見人的中巴，日前身穿街坊裝到大角咀寓所附近一間書局，只見她手持數張寫滿英文的紙張，叫老闆代為傳真，其後迅速回家，未有回答有關Amigo的問題。