徐熙媛（大S）向來都好鍾意小朋友，再加上妹妹徐熙娣（小S）有兩個可愛乖女，經常逗得呢位姨媽嗒晒糖，雖然大S曾經公開話遲早生BB，但依家已經34歲，仍然苦無對象，好在性格樂天嘅大S唔心急，因為同人哋嘅小朋友玩都令佢好滿足。
早排大S宣傳新戲，同小小So傾吓偈，點知現場有個勁可愛嘅男仔，當堂吸引大S，小小So同佢講嘢，佢都聽唔入耳，後嚟母愛氾濫嘅佢仲索性將個男仔「擄走」入自己間房，難得個男仔唔怕「生暴」，冇喊之餘仲不斷向大S獻吻，冧爆大S，之後大S趕做下一個訪問要換衫，佢就將個男仔交畀經理人照顧，點知個男仔唔願意，只肯匿喺大S身後，氹得大S哈哈大笑，最後分開嗰陣，仲嘴扁扁咁同個男仔講Bye Bye！大S都同小小So講，估唔到自己會咁癡纏！