曾志偉監製的《72家租客》與黃百鳴監製的《花田囍事2010》，下周四上畫才正面交鋒，但有指《72》片一段鍾嘉欣一打十的橋段，疑似抄襲《花》片中古天樂一打十的情節，加上無綫以鋪天蓋地密集式撐《72》片，似有厚此薄彼之嫌，激嬲黃百鳴，令他怒抽無綫廣告以示不滿！黃百鳴昨日在長途電話中說：「我聽聞《72》片有段一打十戲，我唔知係咪咁雷同，點解《花》片有呢段戲呢？因為《花》片同《葉問》係同一個編劇，所以先加呢段深入民心嘅戲。」

《花》片抽無綫廣告

對於怒抽無綫廣告，《花》片宣傳公司發言人說：「《花》片宣傳活動無綫只派收費台採訪，冇《東張西望》，無綫話《東》改革咗，娛樂比重減少。（抽廣告以示不滿？）每年廣告係一早買咗，我哋只係冇加碼，既然有關方面未能配合，我哋不如將資源放喺另一媒介仲好。」

志偉昨日得悉被指「抄襲」，即反應甚大，他表示要致電黃百鳴講清楚，並拿着手機說：「百鳴哥，我偷橋？呢啲唔係偷，係致敬，你兩齣戲同一個編劇，你唔係抄，係江郎才盡，你幾時返香港，我請你睇戲，總之大家套戲都大賣啦！」

而無綫外事部副總監曾醒明，對於被指遭抽廣告，他說：「向市場同營業部了解過，一切如常冇變。（無綫偏幫《72》片？）始終邵氏出品會盡量配合，但《花》片我哋都以其他節目配合。」