身在日本的趙式芝（GiGi）對於契媽龔如心遺產案昨日宣判，當得知陳振聰敗訴及打算上訴時，她說：「預咗啦！如果契媽生前想將佢嘅私人事拎出嚟，契媽一早做咗！點解佢要拎啲私人嘢出嚟啫！我對陳振聰No Comment！華懋對香港貢獻好大，單官司一直拖咁耐，令好多嘢都做唔到！」

「全世界嘅笑話」

對於陳振聰為爭產而在庭上公開與龔如心的親密關係，GiGi直斥其所為：「好嬲佢拎啲私人嘢出嚟，好似鞭屍咁！人都走咗，唔係咁好！（覺唔覺金錢係萬惡？）唔單止係錢，一億同十億都係咁使，可能係為啖氣！契媽生前同Tony（陳振聰）咁好朋友，佢係個叻仔，賺到咁多錢，唔使爭都得！女人生前咁重私隱，佢將啲咁親密嘅嘢拎出嚟，好可惜！佢已經做咗一次，上訴嘅話又再做多次，除非佢有好有力嘅證據！佢咁樣做我真係好感慨、好心痛同好憤怒！佢將件事變成全世界嘅笑話，啲人茶餘飯後嘅話題！契媽咁辛苦建立嘅王國，依家咁做敗壞咗佢嘅名聲！（係咪錢嘅問題？）錢係會令人做出好多恐怖嘅事，但都有可能係為咗面子！贏咗單官司就攞到個彩，依家搞到咁何必呢，佢有少少走火入魔！」

姚煒斥反面教材

而GiGi母親姚煒亦大數陳振聰不是：「好肉酸！人都死咗，做咩要攞啲私人嘢出嚟講，係咪唔要聲譽？依家名聲都冇埋！佢咁做對啲後生都有唔好嘅影響，係咪有錢就乜都得？連面子、觀念都可以唔要？係一個反面教材。佢都有家庭，究竟咩對佢先係最重要？都唔知佢點諗！」