本文重點
林心如和陳小春昨日出席化妝師Rick Chin的沐浴護膚品牌新店開張，司儀恭賀小春快將結婚，他表現害羞，被心如取笑「怕醜」！對於有傳與女友將在美國結婚，小春只不停說：「多謝！」問到籌備婚禮進展，他說：「唔講呢啲。（怕醜？）不嬲都係內斂，多謝大家咁有心。（美國度蜜月？）唔知，唔答喇。唔知點答，唔好意思，總之唔講得。（有苦衷？）天意。（有咗？）多謝，唔好意思，唔講得。（仲有個幾月先講得？）係囉！多謝。（搵奶粉贊助？）唔係呀！買唔起咩？呢啲都要人贊助，冇奶粉咪飲人奶囉！要人請o架咩呢啲？」
Rick收栢芝心意卡
至於林心如則否認曾與侯佩岑男友拍拖：「完全唔係，大家唔熟，餐廳見過兩、三次，佢父母同我父母先熟，唔知點解咁傳。（唔係你理想類型？）比較喜歡有性格同有男人味，佢係斯文型，官仔骨骨。（父母安排相睇？）我唔鍾意，大家唔識坐埋一齊好尷尬！」至於與唐季禮的感情，心如說：「大家係朋友，聯絡冇咁密切。（下次揀圈外人？）唔一定，最重要互相了解同溝通到。」對於趙薇被爆懷孕，心如說：「唔知，佢冇講，如果係真會恭喜對方，識佢時佢已經好喜歡家庭溫暖。」
而主人家Rick Chin收到張栢芝送上的心意卡，內附與謝霆鋒和兒子Lucas的照片，他說：「栢芝話Lucas肖像權交咗畀我。」鄭伊健和林珊珊則送上花籃。此外，栢芝聯同九位藝人參與《一人一心》慈善活動，為患乳癌的婦女籌款。