樂壇最後一張成績表《十大中文金曲頒獎典禮》將於今晚揭盅，由於無綫與四大唱片公司反目，令「傳媒大獎」公信力引起爭議，有指以3獎拋離陳奕迅（Eason）的祖兒早已十拿九穩，難怪她前晚出席新碟《Joey Ten》發布會時一臉風騷，似準備好第三度領取「傳媒大獎」！

最近不時為「傳媒大獎」與Eason互窒的祖兒，昨日接受電台訪問時直言已多年沒有攞「傳媒大獎」，所以很想攞，更突然玩變聲說：「陳奕迅，踩扁佢！」顯得信心十足！勝券在握的她，前晚又獲唱片公司豪擲6位數字，在半島酒店筵開五席舉行新碟發布會，除老闆楊受成夫婦、高層吳雨、霍汶希（Mani）、好友蔡卓妍與黃偉文等捧場外，無綫總經理陳志雲、樂易玲、商台高層甘菁菁及新城知訊台台長朱明銳亦有出席。

朱明銳（左起）、楊受成夫婦、祖兒、蔡卓妍、吳雨、陳志雲與甘菁菁，齊齊上台祝酒。

陳奕迅對「傳媒大獎」打定輸數，早前更直言「死咗條心」。 資料圖片

恨放大假遊法國

為表揚祖兒10年來創下的樂壇紀錄，吳雨及Mani向她頒發成績表及畢業證書，又送上法國來回頭等機票，而她代言的百老滙亦送上大利是，認真大豐收！祖兒希望今年可放假來兌現機票，問到最想與誰同行，她說：「可能買多張同媽咪或朋友去。（想放幾耐假？）唔係太多，最想有個幾月，希望去吓名勝古蹟，我未試過一個人旅行，唯一一次好任性咁去日本搵朋友，當時我知有假放，即刻去機場買機票飛過去。（係咪搵前男友陳方藤？）過咗去，依家冇呢支歌仔唱。（識個法國男友？）法國人幾浪漫，但我最希望去睇Fashion Show。」

祖兒（左）作狀為Mani戴四方帽，令她大嚇一跳！

吳雨代表英皇送上來回法國機票，令祖兒喜上眉梢！

對於Eason日前「睇死」她情人節冇人送禮物，又笑言請她食麥當勞，祖兒笑說：「我夠識Call老麥咯！（話你冇人陪？）佢又知？好似好知咁，總之我內心好充實。」她自爆曾收戒指，但問到今年想收甚麼禮物，她卻不願多談：「好似搞到問人攞禮物咁，初戀男友送咗個叮噹畀我，點知火燭燒咗。總之一個人過都可以好開心，依家冇對象。（農曆新年去何韻詩屋企拜年？）睇佢喺唔喺香港，如果喺都會去。」