無 綫新紮小花梁政珏，早前喺劇集《美麗高解像》入面嘅水着Look勁煞食，搶晒女主角徐子珊風頭， 仲畀網友熱捧，人氣急升，令佢出街都多咗人認得，有Fans仲埋身問佢攞簽名同影合照添！不過， 佢早排同小小So講起一件瘀事。
梁政珏：有人話我個名有啲似男仔名，但我好鍾意我個名，因為比較少見。
小小So：比起阿欣、阿思、阿敏嚟講，你個名的確唔普通，睇得出改名嘅人好有斤両，學問應該有番咁上下。
梁政珏：係就係唔普通，但就係因為太唔普通，所以出事囉！
小小So：點出事法？
梁政珏：有次行街，有個女仔離遠大嗌「阿玉」！我起初唔為意，後來至知佢嗌緊我！
小小So：你係阿玉咩？張曼玉呀？
梁政珏：咪係囉！我叫梁政珏 （音角） 嘛！佢叫我阿玉，仲話「阿玉，我係你Fans呀」，我真係唔識點畀反應佢，好瘀呀！
小小So：哦！其實唔好意思嘅唔應該係你，而係明明唔識、但又以為自己好識 嘢嘅佢。不過喺香港地，上述呢種人比起阿欣、阿思、阿敏、阿玉加埋仲要多，慢慢你就會習慣喇！