將滿27歲的阿Yu與25歲的阿Roy，結束7年愛情長跑，明日假葵芳的教堂註冊結婚，雖然兩人曾是歌手，但年前已退出樂壇，歸於平淡，現時阿Roy從事音樂工作，阿Yu則在Amusic任形象統籌，幫衞蘭、Janice Man（JM）及李治廷設計造型。

攝時間Shopping

前日早上11時許，記者在置地廣場的名店Valentino發現阿Yu，她傾了一會電話便入試身室，約半小時後，她與JM步出店外，婚期將至的阿Yu仍忙於工作，為JM到名店試衫。其後阿Yu到尖沙咀加連威老道掃平貨，連逛兩間護膚及化妝品店睇磨沙用品，記者發現她嘴角爆了一粒暗瘡，難怪要急急護膚！之後她往商場買了一杯咖啡「抖氣」及坐下打電話，約15分鐘後，「準老公」阿Roy終於現身，本來托頭休息的阿Yu即表現興奮，兩人卿卿我我，一杯咖啡兩份飲，甜到漏！

甜蜜歎啡 阿Yu買定咖啡等阿Roy，一杯咖啡兩份飲，甜蜜滿瀉！

速買禮服 阿Yu幫阿Roy揀選領呔，還在他身上拼襯。

兩人十指緊扣出發Shopping，第一時間到Calvin Klein揀內衣，似乎是為洞房花燭夜作準備！不過，當阿Yu睇胸圍時，阿Roy表現尷尬，反而阿Yu則大方地為他揀內褲，細心挑選款式及質料，並買下舒適的孖煙囪，而阿Yu卻空手而回，莫非她想保持神秘感，於洞房夜留驚喜給阿Roy？之後兩人殺入Uniqlo睇西裝，任形象設計的阿Yu，幫阿Roy揀選黑色西裝及間條領呔，拿拿臨付款，前後不用半小時已結束Shopping之旅，阿Yu坐的士趕下場開工，阿Roy則到巴士站等車，慳家的他見慈善募捐，即義不容辭捐錢，認真有愛心！

尷尬睇Bra 阿Yu睇Bra，阿Roy站在一旁，笑得尷尬。	掃孖煙囪 阿Yu細心為阿Roy揀孖煙囪。	慳搭巴士 Shopping後，阿Roy發揮慳家本色，搭巴士走人。

事後，記者致電給阿Yu，她坦言手頭仍有工作未完成，前日要幫JM試衫。問到婚禮籌備得如何？她說：「好彩有好多朋友幫手，我同阿Roy都好忙，今日先得閒幫佢買禮服同領呔，我就會着一條白色裙，簡簡單單。」