最近「萬寧妹妹」王允祈憑一句「我有少少鍾意咗『Kui』」而紅爆，連小小So都唔只有少少鍾意「Kui」，簡直係非常鍾意添！有日見到允祈爸爸，同佢傾開囡囡拍廣告嘅趣事。
小小So：允祈爸爸，依家「萬寧妹妹」好紅喎！連我都有少少鍾意咗「Kui」呀！不過妹妹係咪成日講嘢都唔正？
允祈爸爸：多謝你！妹妹唔係專登講唔正個「佢」字，只係廣告公司同妹妹錄咗十幾句，用咗最唔正嗰句，點知就紅咗，其實妹妹講嘢口音幾正！
小小So：咁廣告公司都好勁喎！捉到觀眾心理。
允祈爸爸：係呀！之前佢哋同我講，個廣告冇咁快出！可能拍咗好滿意，所以即刻推出。
小小So：咁妹妹見到自己上電視，有咩反應呀？
允祈爸爸：佢一見到自己就喺度傻笑，仲幫個廣告改咗句對白添！佢話：「不過爸爸對我仲好呀！」
小小So：咁識講嘢？唔怪得你咁錫允祈妹妹喇！