24/01/2010

播放本新聞相關短片

祖兒十分完美

本文重點
樂壇歌王古巨基及天后容祖兒在圈中歷盡起跌,前者正向事業第20個年頭邁進,後者則剛完成豐盛的「黃金十年」,兩人從不放慢腳步,繼續發光發熱,堪稱新一代的學習榜樣。

樂壇天后容祖兒於1980年出生,剛度過了精彩的「黃金十年」的她,過去十年獲獎無數,事業屢創高峰,就算經歷風浪,她亦能咬緊牙關一一捱過,成為「80後」獨當一面的表表者。今年踏入3字頭的祖兒,將展開事業另一章,所謂溫故知新,祖兒由1數到10,細味她難忘的豐盛十年。

1.「媽咪、老闆楊受成、經理人霍汶希同我嘅歌迷,永遠都係我心目中永遠嘅「No.1」,佢哋成日鼓勵我,令我好感動,所以我要更加努力,重新裝備自己,報答佢哋對我嘅支持!」 

2.「過去十年,喺圈中認識唔少好朋友,個個都對我好好,包括同公司嘅好姊妹Twins,佢哋兩個真係冇得頂,又玩得又傾得,我哋有時會傾吓女人心事,大家互撐互幫,所以特別珍惜同佢哋嘅姊妹情。」

3.「終於踏入3字頭,要開始人生同事業嘅另一階段,今年我滿肚密圈,繼續由年初忙到年底,我要強攻國語唱片市場同炮製最佳專輯,年底仲會喺紅館開騷,所有計劃都好似好易,但全部都唔可以有任何差池。」

4.「雖然我工作好忙,但其實真係好想放假充電,而且我想揀4月4日,因為呢一日係兒童節,除咗希望保持童真外,仲希望可以約幾個朋友打番幾圈麻雀,咁就好咯!」

5.祖兒連續五屆蟬聯勁歌「最受歡迎女歌星」,平了已故歌后梅艷芳的紀錄,認真威水!這個紀錄成為她人生其中一個代表作!

6.「講到『6』,唔可以唔多謝我媽咪,因為我係6月16日出世,冇媽咪就唔會有我容祖兒嘅出現,所以我對呢個日子特別有感情,雖然平時工作好忙,但每逢生日,我都盡量抽時間同媽咪過。」

7.祖兒今年大發雌威,於剛過去的勁歌總選,狂擸7個獎,超越譚詠麟和祖兒自己的5獎佳績,成為勁歌史上最多獎的歌手,雖然未知是否後無來者,但肯定前無古人,認真厲害!

8.「諗起『8』字,梗係諗起個諧音『發』啦!呢十年託賴算搵到餐晏仔,但我都會將啲辛苦賺番嚟嘅錢儲起,話晒全部都賺得有血有汗。仲有,啲人成日話我好八卦,但其實我好口密o架!」

9.「雖然我屋企有養貓,但其實我都想養番隻狗,長長久久吖嘛!不過媽咪唔畀。」

10.「過去十年真係過得『十全十美』,好開心能夠有一個咁豐盛同精彩嘅黃金十年,令我好難忘嘅場面,尤其係去年舉行一個試映會,分享我咁多年喺樂壇嘅點滴,好多朋友撐場,令我好感動,嚟緊新一年我要開始事業嘅新一頁,會繼續努力,報答支持我嘅歌迷同朋友!」

天后幾個勁

五度蟬聯《勁歌總選》「最受歡迎女歌星」獎,平了已故天后梅艷芳的紀錄!

成為獲「叱咤樂壇女歌手」次數最多的女歌手,由00至09年連續十次奪獎,於03年更以23歲之齡,成為該項目最年輕的金獎得主。

在剛過去的《勁歌總選》一口氣摘下七個獎項,打破譚詠麟和祖兒自己在勁歌總選獲5獎的紀錄,成績驕人!

勁 

祖兒曾多次在紅館開騷,次次全場爆滿,而且她愛尋求突破,每次出騷均全力以赴,炮製新鮮感給樂迷。

專案組