做老闆

基仔近年事業發展暢順，而且瓣數多多，計仔多多，除了唱歌、拍戲、拍廣告及主持外，他還最愛設計，身為「Kubi老竇」的基仔，最近唱而優則商，升呢做「古老闆」，進軍潮界大展拳腳，對於這個夢想成真，基仔大感雀躍，他還雄心壯志，希望有機會將業務擴展到內地，他說：「香港只係啱啱起步，所以要一步一步嚟，當然我對內地發展業務有期望，希望打入內地，上次同欄王劉翔食飯見面，我都有同佢講過，佢都同我講：『快啲嚟上海開啦！』見到好朋友咁支持，我好開心。」

放大圖片	基仔無論多忙，亦不會丟低親自設計的「兒子」Kubi。	事業心甚重的基仔仍未打算成家立室。

問到會否擔心難以兼顧歌手及老闆身份，導致分身不暇？基仔說：「兩樣我都鍾意嘅，我又鍾意唱歌，又喜歡畫嘢，我兩方面都會放好多心機落去，唔會有矛盾，應該可以兼顧到，最緊要分配到時間。」基仔表示對新公司充滿期望，信心十足，他說：「我覺得自己好幸福同幸運，可以將唱歌同設計呢兩樣興趣，成為我嘅事業。」

基仔帶挈女助手Lorraine做新店老闆娘。

放大圖片

談攞獎

剛蟬聯「最受歡迎男歌星」的基仔，感激外界對他的支持和愛戴，問到會否有信心再度冧莊？他笑說：「啱啱先攞咋喎！未諗到咁遠。」對於現時獎項的看法，基仔說：「從來都係嗰句，出發點喺工作上，因為我想做好本分，唔係為攞獎先至工作，我會發揮自己最好一面，獎項係鼓勵同錦上添花，唔應該本末倒置。」

不經不覺，基仔已踏入娛樂圈20個年頭，他說：「每逢10係一個階段，依家踏入第二個10，感覺好特別，時間好似過得好快，但又好似經歷咗好多，嗰日勁歌頒獎禮，廣告期間重播好多片段，仲見到自己當年主持《娛樂新聞眼》個樣，真係時光飛逝。」

未結婚

基仔事業之所以發展順利，除了個人努力及實力外，其緋聞女友兼助手Lorraine的功勞，亦功不可沒，Lorraine還打正旗號「升呢」時裝品牌店老闆娘，足見其重要地位。談到會否渴望快點組織家庭？基仔說：「講真，依家仲未諗到呢樣嘢，我工作上好多鬼主意，有時無啦啦有新諗法，就會有所動作，所以依家暫時都係事業為主。」問到是否成為吸金王，所以財多身子弱？他說：「都係搵餐晏啦！依家仲有少少傷風感冒，我會多注意身體，因為呢一年將會好忙。」

多棲瓣瓣掂

唱歌

基仔在樂壇打滾多年獲獎無數，不少金曲也膾炙人口，包括《愛得太遲》、《愛與誠》及《地球很危險》等，今年他更蟬聯「最受歡迎男歌星」。

演戲

基仔曾演出人氣劇集《還珠格格》及《情深深雨濛濛》，演技備受讚賞，更成功開拓內地市場。

設計

向有繪畫天分的基仔自創Kubi公仔，深受愛戴，今年他再下一城，唱而優則商做「古老闆」，進軍潮界展拳腳。

主持

形象健康的基仔主持《係咪小兒科》大受歡迎，「古Sir」形象深入民心，吸納大批小朋友Fans。