現年18歲的李蘊（Renee），當年以「童工」身份組成三人女子組合Cream，去年嘗試獨立發展，雖然成績不俗，但亦甘願放棄頒獎禮，早前頻頻與同門的E Cup Baby出騷賺錢。近日Renee更不顧歌手身份，搵多條出路，在鑽石山荷里活廣場童裝店兼職做Sales，看來對「錢」途着急得要命！據知，年紀輕輕的Renee是家中經濟支柱，朋友亦出手相助，早前經朋友介紹到童裝店工作，雖然老闆以「形象指導」之名聘請她，但實情搬貨看舖一腳踢，難怪她被記者當場踢爆後，尷尬到爆廠！

當日下午12時許，Renee如常到童裝店開工，只見慳家的她搭幾蚊巴士抵達，然後直上3樓童裝店，當時店內已人頭湧湧，有數名家長偕小朋友光顧。身穿短褲的Renee火速埋位，既要Sell客為小朋友換衫，亦忙於湊細路，名副其實一腳踢！期間一名約兩歲的BB在店內走來走去，突然扭計蹲在地上，要Renee出動零食氹她，其後她又與男孩玩扯大纜，怎料一時失平衡，被拉至跌倒地上！

身水身汗做搬運

氹完細路，Renee又要外出搬貨，身水身汗拎住兩個大膠袋，雖然被不少途人認出，但她依然頂硬上，快手快腳入舖！忙完一輪，她在櫃枱前捱麵包，此時記者上前訪問，她愕然又尷尬地死撐並非Sales，只是幫朋友做形象指導：「間舖係我朋友開，佢哋拍廣告，搵我做形象指導，我唔係喺度做！（見你搬貨？）老闆出咗去，我幫手啫！」她表示對酬勞滿意，問到是否賺錢養家？她尷尬地笑說：「唔好咁講！趁後生想搵多啲，當零用錢使吓都好！（你唔係屋企嘅經濟支柱咩？）唔答得唔得呀？總之屋企唔係得我一個出嚟搵錢啦！」

李蘊在櫃枱捱麵包，不忘(目及)實店內情形。

李蘊忙極執頭執尾，難免有蝦碌場面。