近排HKRIA同無綫嘅版稅糾紛，搞到四大唱片公司嘅歌手成為磨心，依家件事都仲未知點收科。貴為「四大」歌手之一嘅李克勤最近出咗新碟，雖然佢係「無綫契仔」，但一樣冇情講，無綫冇派人採訪佢嘅新碟記者會。雖然係咁，但克勤仍然落力做宣傳，小小So仲知道佢好關心樂壇新勢力嘅情況，對新一代唱作歌手王梓軒評價幾高，印象唔錯！
小小So：睇好依家新一代邊位歌手？
克 勤：我覺得王梓軒幾好，佢之前做過我同阿倫演唱會嘅和音，表現唔錯，佢仲識好多樂器！佢嘅舞台經驗尚淺，要多啲吸收台上經驗。我知佢擅長唱R&B，但有時表現Over得滯。
小小So：咁女歌手呢？
克 勤：依家缺乏一個好正經同好靚嘅女歌手，好似當年周慧敏、Twins同楊采妮，唔使話一定超靚，但最緊要入屋，令人留下印象，但呢排真係冇乜呢類女歌手。